Nisin Thuhiltu

 3 May 2017

CM in 1 Day Media Seminar hawng di

Lamka, May 2 (Nisin Thuhiltu) : Editors’ Guild Manipur leh Manipur Hill Journalists’ Union saina a hung tung ding 6th May (Saturday) 2017 at 10.30 am leh Lamka Press Club, HQ Veng, Churachandpur ah Reception- cum- One Day Media Seminar on “Communal Harmony: Bridging the Gap” kiti um ding a hi. Zia hun chu N Biren Singh, Chief Minister, Manipur; Th Biswajit Singh, Minister (IPR); K Radhakumar, Commissioner IPR; Sothing Shimray President, Manipur Hill Journalists Union leh A Mobi, President, Editors’ Guild Manipur te’n Chief Guest, Special Guest, Guests of Honor leh Functiona President hina tawh uap ding a hiu a, N Biren Singh, Chief Minister, Manipur in Seminar hawnna nei ding a hi.

Awareness Workshop on E-Waste Management Training

Lamka, May 2 (Nisin Thuhiltu): National Institute of Electronics & Information Technology (NIELIT), Imphal leh Churachandpur Community College, Churachandpur College kitua in Churachandpur Government College ah zani a pat ni 5 sung um ding Awareness Workshop on E-Waste Management Training a nei uh chu a chia tha zing hi. Training a hileh zani’n a hawnna hun mat a hia, zia hun ah Chief Guest hina tawh uap R Sudhan, IAS, DC CCpur in 5-Day Awareness Workshop chu a la hawng hi. Ricky Vanlallawm, Principal, Churachanpdur Government College leh Th Premeshwar Singh, Executive Director, NIELIT Imphal te’n Guest of Honor leh Functional President hina tawh a uap gel ui. Training hun sung a hin electronic matchak chuam chuam a sia kidawi talote mihing leh ganhing ban ah thing leh lo te damtheina a sukkhak lo na ding ah kawidaw (dispose) dingdan zilsakna piak in a um a, tuni’n District sung a Government Department chuam chuam a pat staff te’n ‘Environmental and Health Hazard of E-Waste, Challenges and Opportunities, Management Rule 2016’ ti pansan ah training a nei ua, training hun sung a hin Field Visit le nei ding a hiu.

Thiguapi’n school mutsia

Lamka, May 2 (Nisin Thuhiltu): Thiguapi hat mama a nung ziak in zani, May 1, 2017 a khan Evangelical Baptist Convention (EBC) etkawlna nuai a um Sinzawl Convention English High School chu a la mutsia’i. Thutut kimu dungzui in, thiguapi hat mama nung chun Sinzawl khua a um Sinzawl Convention English High School ah class leh staff room chuam chuam pang in room hunkhawp a mutsia, tuni zingkal a pat in Zomi Young Association (ZYA), Sinzawl malatna in khawsung mipi’n, social work nei in, mutsiat a um school room chuamchuam te bawl a hawi ua, zingkal ah social work zaw a hitawh kitawn in a ngaina gual ah naupang te school kai kit thei uh hi’n a kigen hi.

One Day Legal Awareness Campaign nei

Lamka, May 2 (Nisin Thuhiltu) : District Legal Service Authority (DLSA) Churachandpur leh COCU kithua in tuni’n Songpeh Community Hall ah One Day Legal Awareness Campaign nei in a um a, zia hun chu Mangkhothang Haokip, Chief of Songpeh in Chief Guest hina tawh a uap hi. Advocate Khamkhanthuam, Chairman, Collective Lawyer Trust in ziltilna a piak hun a chun, mipite’n mani chanvo (Rights) hiat pawimaw a hi ban ah dân hia te’n le rights tawh kisai ah mipi te hiatthiamsak ding pawimaw hi’n a gen hi. Directive Principle of State Policy a pat ki bawldawk, Right to Education chu Government in a ngai pawimaw mama khat hi ah genlang kawm in zia chu mangcha’ naupang te hiathiamzil sak in lekhabu, school uniform, tution fee leh a pawimaw dang dang chu a thawn ah pia a hi chu hiat ah pawimaw hi’n le a gen hi. Human Right Activist Phukindro Konsam in dân nuai ah mi zosia kibang leh humbit a um hi’n a gen a, Protection of Children from Sexual Offence (POCSO) Act in naupang te chu gamtatna hawilo a pat vengbitna pia hi’n le a gen hi. Chun, Food Security, RTE, Old Age Pension leh a dang dang te chu diktat tak ah mat a hi nam ti mipi leh lawi upate kingaitua thak pawimaw hi’n a gen hi. Campaign hun chu Suangpeh kiang a um khua 4 ah hausate ban ah student, Youth Club ban ah mipi hunkhawp te’n le a uap ui.

 One Day Capacity Building Program um di

Lamka, May 2 (Nisin Thuhiltu): Zonal Education Officer (ZEO), Churachandpur saina nuai ah a hung tung ding May 5, 2017 sunma dak 10:30 in Synod Hall, IB Road ah “One Day Capacity Building Program on Implementation of Mid-Day Meal Scheme” kiti nei hiding a hia, hun matna chu R. Sudhan, IAS, Deputy Commissioner, Churachandpur in a hawnna nei in thugenna le nei ding a hi.  RK Tenedy, Additional Director, Science leh State Nodal Officer, Mid-Day Meal in seminar la ding a hia, zia hun ah pang ding ah teldaw a um maleh a pang lo school te chu Mid-Day Meal Scheme a pat paithak hi ding uh hi’n thutut a kimui.

Refresher Course chiatha zing

Lamka, May 2 (Nisin Thuhiltu): Rakesh Balwal, IPS, SP Churachandpur panlakna in District sung ah Police Personnel te Refresher Course training chu Multi-Purpose Hall, Peace Ground, Tuibuang ah a chia tha zing hi. Training a hileh Batch ah kikhen in, buaina a um hun a mipi tawh kinawk tuana a um khak leh thagum a tawm theipen mang ah mipi sukthip ding dan zilsak in a hiu a, zia training chu District sung ah police personnel zosia piak hiding uh hi’n a kigen hi.

 EM kipakpina nei

Lamka, May 2  (Nisin Thuhiltu)

: Elim Veng Village Authority, YPA Elim Veng leh PTC Elim Veng te kithua in Elim Veng ah MDC um sun T. Paukhanlian in tunai ah ADC, Churachanpur nuai ah Executive Member (EM) a tuk thak kipakpina hun a mat piu a, zia hun a hin YPA Elim Veng Unit leh PTC Elim Veng Unit te a pat executive member hunkhawp a pang ban un kochuam puitu hunkhawp te’n le zia hun chu a uap ui. T. Paukhanlian a hileh Ngazam bial MDC ding ah teltin in a um a, tunai ah Executive Member ding ah guat in a um hi.

Ex-Servixemen Rally um di

Lamka, may 2  (Nisin Thuhiltu): Assam Rifles Battalion, Churachandpur saina nuai ah a hungtung ding May 6, 2017 zingkal dak 9 a pat in District Training Centre (DTC), Tuibong ah Assam Rifles Ex servicemen rally um ding a hia, zia hi a hileh fim leh chawl khawk salo ban ah hangsan, pawnthaw leh gin-um tak ah Assam Rifles ah pension chan a la sem te chawisanna ding ah sai a hi. Rally hun ah ex-servicemen te’n pension tawh kisai ban ah buaina chuam chuam a nei teu sukven piakna ding ah stall chuam chuam kihawng ding a hi. Zia hun a hin Assam Rifles ah Ex servicemen leh a sungkuan te a ding in Medical camp, CSD Stall, Addhar card stall, ban ah District Administration, Agriculture Department, Horticulture Deparemnt leh Krishi Vigayan Kendra (KVK) te’n le amau department tawh kisai in stall hawng chiat ding a hiu a, bank lam tawh kisai a buaina nei te a ding in State Bank of India (SBI) leh Axis Bank te’n le stall khat gel hawng ding a hiu. Bisnupur leh Churachandpur district te ah Assam Rifles Ex servicemen te a diing ah ki sai ding zia Rally hun chu V Hangkhanlian, Minister, Agriculture, Veterinary & Animal Husbandary, GoM, R Sudhan, IAS, DC CCpur, Rakesh Balwal, IPS SP CCpur, Senior Assam Rifles officer, bank official leh district administration official te’n le uap ding a hiu.

 Education Tour ah Zillai Rayburn Unit chia

Lamka, May 2  (Nisin Thuhiltu) : Zillai Churachandpur Block nuai ah Unit te lak ah khat Zillai Rayburn College Unit member te Dzükou Valley ah Education Tour ding in tuni, 2 May 2017 zingkal dak 8:00 in a kipan dawk ua, Rayburn College Principal, Khen P Tombing in tour chia ding te flag-off bawlna nei in a thadawk hi. Tour ah chia ding te thakdawna hun chu Zillai Churachandpur Block  President HS Kaiminlun leh Block member hun khawp in le a uap ua, tour ah chiate mapui ding in Block in Th. Lian Vaiphei, Joint Secretary a sawl hi. Tour ah chia te chu  May 5 leh Churachandpur hung tung kit ding ti a hi.

 25 AR in desktop computer set pia

Lamka, May 2 (Nisin Thuhiltu): 25 Assam Rifles 'Friend of the hill people' in Lamka Press Club, HQ Veng, Churachandpur ah mat ding desktop computer  set khat banah printer leh stationery items chuam chuam Military Civic Action programme nuai ah a piakna chung in Manipur Hill Journalists’ Union (MHJU)  (Affiliated to Indian Federation of Working Journalists), General Secretary, S. Nengkhanlun in MHJU thasik in kipakthu a gen a, a bik tak ah  Defence PRO Imphal, Mr Ajay Sharma, Commanding Officer 25-Assam Rifles,  Mr Sanjay Kumar leh Town Commander, Mr Radha Krishan benah Mr Pankaj Giri  te chung ah kipakna sang diak a hidan taklang kawm in Army te leh Journalism fraternity in maban ah panlakna a nei khawm zing ding uh dawi a hidan le a taklang hi.

Food Safety Enforcement Wing drive bawl

Imphal, May 2 (Nisin Thuhiltu): Imphal East, Imphal West, Thoubal leh Bisnupur Districts- Food Safety Enforcement Wing in tuni’n Masjid road leh Thangal Bazaar in Food Safety Commissioner, P.K Singh mapuina nuai in diklo tak ah van zawkna tawh kisai drive bawlna a nei ua, zia hun a chun licence bei ah kizuak van hunkhawp a man dawk ui.  Mun khenkhat ah zia  gual drive um thu chu a hiat uh tawh kitawn in dukan neitu te’n a dukan uh a khak hial ui. Enforcement Wing in Food Safety & Standards Authority of India-FSSAI license tawh kituaklo ah van zuak huntiang mudaw nei a hidan uh taklat in a um a,  expiry date ki zikna umlo - , Myanmar gam a pat ki pawlut - Myanmar pau ah kizik stickers kibel, manufacturing dates a vel vel ah ki print pawl le hun tiang a man dawk ui. Designated Officer of Food Safety & Administration, Thounaojam Sunilkumar in le drive bawlna’n pan a la, masang ah naupang te nek ding ah dawilo umlo nekthei khenkhat banned  ah um le kizuak zing ah mudaw um ah taklat in a um hi.

  March 2018 leh Imphal -Jiribam Road ah black-topping zawthian hiding

Imphal, May 2 (Nisin Thuhiltu): Manipur a ding ah second life line National Highway 37 (Imphal -Jiribam Road) siamthakna (repairing) nasep chiapi - National Highway Infra-structure Development Corporation Limited, NHIDCL in March, 2018 leh black-topping bawl zo ding a hidan uh tuni’n taklat in a um hi. Zia lampi siamthakna nasep chu masang ah Border Roads Organisation (BRO) in a chiapi sek himaleh tunaicha NHIDCL in Ministry of Road Transport & Highways, Government of India nuai ah lampi siamna nasep a lak a hi. NHIDCL chun National Highway, kilometer 218 ah sau lampi siamthakna nasep a nei a hia, ziana ding a chu Ministry Rs 145 Crore sanctioned a bawl a hi. Chuleh, NHIDCL in Barak leh Makru ah RCC Bridge siamthakna le a nei a hia, ziana ding a chu Ministry  Rs 106 crore sanctioned a bawl, kum 2019 ah a zaw thian ding ti a hidan General Manager (Project) Sunil Kumar in a gen hi.  Hiatthei khat chu Prime Minister Narendra Modi in Imphal -Jiribam lampi dinmun chu  April 26 ni, video conferencing ah Chief Secretary, NHIDCL, PWD official te tawh review bawlna a la nei a hi.

Teacher te’n kichatna bei ah panlakna a nei uh pawimaw: Education Minister

Imphal, May 2 (Nisin Thuhiltu): Hiyanglam Assembly Constituency ah um government schools um te vena nei in Education, Labour and Employment Minister Th. Radheshyam in tuni’n teachers leh student te holimpina a nei a, quality hawilo tak ah school infrastructure kisakna nasep te a chawlsak hi. Education Minsiter in school 5 - Sekmaijin Primary School, Dhabali High School (aided), Langmeidong Higher Secondary School, Langmeidong Girl’s High School (aided), The Khoidum Primary School te vena a nei hun in education system siam hawi ding pawimaw a hidan tangko in, dukdaklo tak ah school function um theilo ding in a gen a, school te puaphatna ding ah a pawimaw dungzui ah panla ding a hidan a gen hi. Chun, teacher te’n kituptak ah student te ziltil ding pawimaw leh student te’n a hiatthiam thei ding lam ua, kiziltilna a um ding pawimaw in a gen a, teacher te’n thilpha a um theina ding ah kichatna leh lauthawnna a neilo ding uh pawimaw in a gen hi. Chuleh,  school building kisa zo thak -The A. N. K. English Academy, Langmeidon  hawnna hun le uap in education department  chu department pawimawtak a hi dungzui ah education masawnna ding leh khangthak te’n maban hawi tak a nei theina ding ua schools leh institution te a kitup ding pawimaw in a gen hi. Zia school thak hawnna chu MLA Hiyanglam A/C Dr. Radheshyam Yumnam leh education department, ZEOs official hunkhawp in le a uap ui.

 Henu (Ema) Market sakna ding mun etthakna nei

Kangpokpi, May 2 (Nisin Thuhiltu): Local MLA and Social Welfare &  Cooperation Minister, Nemcha Kipgen in Agriculture, Veterinary & Animal Husbandry Minister, V. Hangkhanlian tawh tuni’n Kangpokpi District ah Henu (Ema) Market sakna ding mun etthakna a nei ua, Kangpokpi Ward No.14 ah Regional Cattle Breeding Farm chu Veterinary and Animal Husbandry Department te piakdaw ding in lemsakna a um hi. Henu (Ema) Market sakna ding tawh kisai chu  Chief Minister N. Biren Singh in Kangpokpi district a phak hun ah a puan a hia, tuni ah a mun ding etthakna chu a bawzuina a hi. Minister Nemcha in Henu (Ema) Market sakna ding mun etthakna a nei hun ah thuthak lakhawm mite kiang ah a genna a chun,  BJP mapui state government in Kangpokpi District ah developmental project chuam chuam taksua ding a guatna chung ah kipak mama in a taklang a, zia hun ma a chun, Sadar Hills Autonomous District Council, Kangpokpi in Minister 2 te kipakpina hun le a matpi ngal ui.

Agriculture Minister in State Agricultur Fare hawng  

Imphal, May 2 (Nisin Thuhiltu): Iboyaima Sumang Lila Shanglen, Palace Compound, Imphal East ah tuni'n ni 4 sung um ding  State Agriculture Fare a kipan a, zia hun chu Agriculture, Veterinary & Animal Husbandry Minister, V. Hangkhanlian in khuallian hina tawh uap in State Agriculture Fare hawnna a nei hi. Minister, V. Hangkhanlian in a thugenna a chun, state sung ah agriculture product kibelap theina ding ah panlak chiat ding pawimaw in a gen a, state population 75% chu agriculture ah kinga himaleh state in a pawimaw ann-chang kum khat ah 11 metric ton piang dawk zo ngailo in a gen hi. Inn leh factory ki sak ziak ah Lo bawlna gam te neu deu deu in a gen a, zia chu lo-bawl mi te leh agriculture department ding ah thil lau um a hidan gen in scientific leh mechanize farming chiapi ding pawimaw hin a gen hi. Chuleh, training leh awareness workshop a um zing ding pawimaw in a gen a, ziana ding a chu agriculture department in panla ding hin a gen hi. Hun matna uap Jason A Shimray, Commissioner Agriculture in a thugenna a chun, state sung ah agriculture policy thak chiapi hiding in a gen a, farmer insurance policy le chiapi hiding a hidan a taklang hi. Hun matna chu Dr N Premjit  Vice Chancellor  Central Agriculture University (CAU), O Nabakishire Chief Secretary, Manipur ten le a uap ui.

Governor in ‘Oorja’Football Talent Hunt Tournament 2017 hawng

Imphal, May 2 (Nisin Thuhiltu): Khuman Lampak Main Stadium  ah zani May 1 a khan 9 Sector Assam Rifles saina’n Manipur Governor Dr Najma AHeptulla in ‘Oorja’Football Talent Hunt Tournament 2017 hawnna a nei a, zia football extravaganza  chu ni 10 sung (01-10 May 201)  um ding a hi. ‘Oorja’Football Talent Hunt Tournament 2017 hawnna hun chu Deputy Chief Minister Yumnam Joy Kumar Singh, Youth Affairs & Sports Minister LetpaoHaokip leh Maj Gen Virendra Singh, VSM, IG AR(S) te’n le a uap ui.

 IFCD Minister in Chadong villager te tawh kihona nei

Imphal, May 2 (Nisin Thuhiltu): IFCD Minister Letpao Haokip mapuina  IFCD official leh Mapithel dam-affected Chadong villager te’n tuni’n Secretariat Conference Hall, Imphal in meeting a nei ua, zia hun a chun Chadong villager te’n thiangtho tak ah compensation piak a hiding uh phutna a nei ua,  zialo a chun Mapithel dam in a suk khak ding mipi te’n  khawsak theina ding dang piak ding phutna a nei ui. Chun, IFCD Minister leh official te chu villager te haksatna leh a dinmun uh entha ding in chialna a bawl ui. IFCD Minister Letpao Haokip in  Government in Mapithel dam-affected villager te haksatna sukven ding dawi a hidan gen in, delegate te a mun ah thil umdan entha ding ah sawl ding a hidan a gen a, Works, Agriculture, Fisheries, PHED leh CAF&PD Minister te panna High Power committee in Mapithel dam in a sukkhak khawmi (villager) te haksatna suveng ding a hidan a gen hi.Chuleh, ama mimal tak ah a mun ah thil umdan entha ding hin  agen a, Mapithel project zaw thian vak a hina ding ah kithuapina peding in villager te a chial bawk hi. Zia meeting chu Gopen Meitei, Secretary of IFCD; Ksh. Pritam Singh, Chief Engineer (IFCD); Shri P. Ingocha Singh, SE/TC-I), Ibomcha Sharma, EE/TPD-I leh  L. Tamocha Roy, AE/TPD-I  te’n department palai hina tawh a uap ua, Kahaosang Mahong, Secretary of Chadong Village Authority (R&R Committee) mapui Chadong Village Authority member 12 te’n  kihona a uap ui. Chun,  IFCD Minister Letpao Haokip in Mapithel Dam in a sukkhak khua 17 ah chiefs/Headmen te le a kihopi hi.

Tuhun tawh kituak ah Lamphel Super Market sakthak hidi: Th. Shyamkumar

Imphal, May 2 (Nisin Thuhiltu): MAHUD Minister Th. Shyamkumar in tuni’n Lamphel Super Market etthakna nei in  Chief Guest hina tawh Lamphel Super Market Chaokhat Thourang Nupi Lup leh Khwairamband Bazar New Market Non-Licence Holders Association  te 7th Foundation Day a uap a, ama’n a thugenna a chun, tuhun tawh kituak ah market shed thak sak hiding in a puang a, Lamphel Super Market dinmun tawh kisai chu Chief Minister N. Biren Singh leh Council of Minister te kiang tut ding a hidan taklang kawm in a pawimaw dungzui ah van zuak te kithuapi ding hin a gen hi. Zia hun matna chu

H. Nutanchandra, Corporator of Ward No. 3, IMC; Ima S. Ibetombi, President of Lamphel Supermarket Chaokhat Thourang Nupi Lup; Ima Ibemhal, President of Non-License Holders Association, President of Mao Union; women vendors leh local mi tamtak ten a uap ui.  

RIMS ah dan thak kisiam

Imphal, May 2 (Nisin Thuhiltu): Regional Institute of Medical Sciences (RIMS), Imphal ah Director  RK Dinesh Singh in head of department zosia chu  a kisaipi department/unit Dean te kiang ah attendance register pelut chiat ding in hiatsakna a bawl a, zia order dungzui a chu working day sin leh zingkallam dak 10:00 ah attendance register piaklut ding ti a hia, attendance hawi leh hawilo etzuina ding ah dan thak siam a hi.

RD&PR Minister Th. Biswajit mapuina SEGC in meeting nei

Imphal, May 2 (Nisin Thuhiltu): Conference Hall, Old Secretariat, South Block, Imphal ah tuni’n Rural Development and Panchayati Raj Minister Thongam Biswajit Singh chairman hina nuai in State Employment Guarantee Council (SEGC) in FY 2017-18 sung ah a khatveina ding in meeting a nei ua,  zia hun  a chun  Minister in government schemes zosia lawting tak ah implement bawl a hitheina ding ah a kisaipi official zosiapi government kithuapi leh panlakpi ding in chialna a bawl a, a kisaipi DC te suggestion dawtna le a nei hi. DC leh official te chu Zilla Parishads gual ah panla ding leh scheme chuam chuam te local mi te kituptak ah hiathiam sak ding in chialna  bawl hi. Zia meeting agenda a chun,  Labour Budget (FY 2017-18); financial and physical progress (FY 2016-17); approved (PDs) Persondays & Fund requirement;Focus Areas; Incomplete works; delay in payments of wages; GeO MGNREGA ti te banah issue chuam chuam genkhawmna a nei ua, meeting chu Principal Secretary (Finance), Principal Secretary (Labour), Secretary (RD&PR), all DPCs/DCs leh non-official member hun khawp te’n a uap ui.

Manipur High Court MJS  Recruitment

Manipur High Court nuai ah  (Grade -III) Manipur Judicial Service (MJS)  post 9 ah  sem ding lakna ding in Registrar (ADM/PM&P) High Court of Mnaipur in notice a sua a, titna nei leh lunglutna nei te’n 20th May 2017 tiang ah apply thei hiding a hi.

High Court of Manipur Recruitment April 2017 MJS Grade III

The High Court of Manipur has invited application from eligible candidates for the recruitment of the post in Grade III of the Manipur Judicial Service (MJS). Details of the recruitment are as follows:

Name of Post: (Total No. of Posts)

1. MJS Grade-III: 09 Posts (Likely to be increased

Reservation:

UR:05, ST:02, SC:00, OBC(M):01, OBC:(MP):01

Group/Class of Posts: A

Age Limit: (As on 20th May 2017)

a. 35 years for UR

b. 38 years for OBC

c. 40 years for SC & ST

Educational Qualification:

Degree in law from a recognized University established by law in India

Desirable:

Knowledge of Manipuri/other local languages of Manipur

Pay Scale:

Rs. 27700-770-33090-920-40450-1080-44770/-

Mode of Selection: Written exam followed by Viva-Voce

Exam Pattern:

Centre of Examination: Imphal

Application fee:

a. Rs. 1500/- for UR/OBC(M)/OBC(MP)

b. Rs. 1000/- for ST/SC

Mode of Payment:

In the form of challan (annexed as Annexure A along with the Application Form) with SBI Branches through core Banking network all over India on or before 20th May 2017. Original copy of challan to be attached along with the Application From.

How to apply:

Candidate need to submit application form which can be downloaded from the official site of the link given below and submit the duly filled application along with the needed documents to the following address via

a. In Person- to be submitted in person to the Receipt and Despatch Section, High Court of Manipur

b. By Post-

"The Registrar

High Court of Manipur

Mantripukhri Imphal

Manipur- 795002

Important Dates:

1. Last Date of Application Form Submission: 20th may 2017

2. Date of Issue of Admit Card: 15th June 2017

3. Date of Examination: 23rd & 24th June 2017

NEWS- NOVEMBER 27, 2016

KSO CCpur in student curfew puang

Lamka, Nov. 26: Kuki Students’ Organization (KSO) Churachandpur in thusua a bawlna a chun High School leh Higher Secondary School kumtawp Exam a nai tawh kitawn in Student lekha simlai te ding ah Curfew  puan a hidan a taklang a, zia dungzui a chu November 26, 2016  a pat student kuama nitak dak 5:00 leh zingkal dak 6:00 kikal ah a vak lum let umtheilo ding ti a hia, zia curfew chu exam zosia zawthian ahi masia chiapi hiding in agen hi. Chun, nu-le-pa leh gurdian te chu  Student Curfew enzui ding ah mawpuakna piak ah um KSO Volunteer-te kithuapi ding in dawtna a siam hi.

Gari gu kipei khat kimandawk

Lamka, Nov. 26: Khawpi sung ah Gari chuam chuam gu kipei khat tuni’n matdaw in a um a, mat ah um gucha chu Paominthang@Joy (31) s/o Kailian of Mata Mualtam a hia, a chiata November 21, 2016 zankim dak 12:00 leh zingkal dak 4:00 kikal vel ah Thingkangphai a um, Lalngurliana Sailo in a inn ah a kawi, Karisma Bike, (Registration Number MZ01E 6876) gudawk ah a zuak chu, tuni a zuakna pa Bike ah a tailai mu a hi tawh kitawn ah Bike chawtu a pat  Paominthang@Joy chu matdaw ah um a hi. Joy chu Chemcha, Activa RC Book, (Registration Number MN01Q 7796) Wakambam Dina Sing s/o (L) W. Nodia Singh of Laipham Khunou Nayai Leikai, Imphal min ah um leh Driving Licence, J. David Hmar of Rengkai Road tawh matkhawm a hia, a kipuandan in khamthei bawl a hi ziak ah a khamthei chawkna ding ah gukchak a chiin hi’n a gen hi.

Nov. 29 leh Sum note thu genkhawm hiding

Lamka, Nov. 26: Soiminlian Lengen, MCS, Chief Executive Officer, Autonomous District Council, Churachandur in thusua a bawlna a chun,  India Government in sum note lian Rs 500 leh Rs1000 mat hitalo ding ah a puan nung ah mitamtak in buaina a tuak zingna chung ua, district sung ah a kisaipi chuam chuam te tawh  November 29, 2016  nitaklam dak 2:00 leh Chairman, ADC Office Chamber  ah genkhawm hiding in a gen a, zia hun chu pello ah, pangkim chiat ding in a kisaikhakpi, Association, Bank Manager tit e hiatsakna a bawl hi.

International Law Day

Lamka, Nov. 26: Churachandpur District Legal Services Authority (DLSA) saina tuni’n Life Café, Rengkai Road ah International Law Day mat in a um a, zia hun a chun Letkho Kipgen, Secretary, CDLSA in vaidawn thugenna a nei a,  David Piaklian, MCS, Additional SP (Law & Order), Churachandpur leh AG Sharma, SDPO Churachandpur te’n dan leh thupiak enzui a hi dungzui un, Dan tawh kisai ah panlakna chuam chuam um te a gen ui. International Law Day kimatna chu District sung ah Civil Police leh Women Police tamtak in le a uap ui.

UKB’n a thupi theipen ah Cup lawm ding

Lamka, Nov. 26:United Khawzim Bothers (UKB) official te leh supporter te’n tuni’n VPC Office, Belthel Veng, New Lamka ah meeting a nei ua, zia hun a chun 8^th Seikam Memorial Open Tournament 2016 ah ah  Cup a lak uh lawpna a thupi theipen ah nei ding in lemsakna a nei ui. Cup lawpna tentative date ding in 14 December 2016 a guangal ua, amun leh a hun ding banah programme  detail tawh kisai tunung sawtlo ah suadaw hiding in le lemsakna a nei ui. Chuleh, a kihiatdan in Cup lawpna chu nikhat pumlum (day & night) ah nei hiding leh entertainment chi chuam chuam tawh thua hiding in a kigen hi.  

MEMCOS in ‘Golden Jubilee’ mang

Lamka, Nov. 26: MEMCOS Office, Ngulthong Bazaar, New Lamka  ah Manipur Ex-Servicemen MPCS Limited (MEMCS) kiphudaw nung kum 50 tin lawpna ‘Golden Jubilee” tuni’n a um a, zia hun chu Langkhanpau Guite, Chairman, ADC Churachandpur in Chief Guest hina tawh a uap a, Gouzamang Guite, EM, ADC Churachandpur in Guest of Honor hina tawh a uap hi. Chief Guest Langkhanpau in Jubilee Suangphuh hawnna a nei a, Rev. T Songkhanthang, Local Pastor, EBCC Vengnuam in Pathian’ kiang ah latna a nei hi. Havildar Evangelist Haukhopau Gangte in member thita te suunna hun a mapui a, Lance Niak Sumkunga, President in MEMCOS dinmun leh a umdan genna a nei hi. Guest of Honor Gouzamang in a thugenna a chun , sepai pension nung ah Pawl kibawl dawk kum 50 tin lawm thei ah a um kipakpi a hidan a gen a,  jubilee kimang chu semtu tamtak te ding ah lamhiltu a pan ding a nawp thu a gen hi. Chief Guest Langkhanpau in a thugenna a chun, MEMCOS member famta te suunpi mama a hidan taklangkawm in, Service zaw nung ah MEMCOS member  khawtang leh Kochuam ah kimang tamtak a um chu thupi sa a hidan a gen hi. Tulai sum note 500 leh 1000 mat theilo ah a umna chung ah kihiatthiamna tawh khawsak chiat ding a nawp thu genkawm in Christmas leh Kumthak matna a buailona  ding ah sum note lui te kila tua leh kipia tua ding in a gen hi.  MEMCOS chu  Managing Director 1, Board of Directors 9, member 140 vel nei a hi.

Dist. 1^st Division League final ah NLYC in KYU zo

Lamka, Nov. 26: Churachandpur District Sports Association (CDSA) saina a chiatha zing (L) Khaikhanlian First Division League final match , Peace Ground, Tuibuang ah tuni’n a um a, match kipat masang in (L) Khaikhanlian’ Nu-le-Pa te’n player te inspection bawlna a nei ua, Match Refree mapuina  (L) Khaikhanlian suunna hun mat in a um hi. Final Match ah NLYC leh KYU te a kihel ua, full time ah gual goal khum a um lo ziak un penalty ah NLYC in 4-2 in KYU a zo a, (L) Khaikhanlian First Division League ah Champion hina a chang hi. A langkhatlam ah First Division League final match  um ziak a chun, (L) Damien Letminlun Gangte Memorial District II Division League kihelna tuni’n chawlsak in a um hi.

Dr. Aarti in SVEEP tawh kisai ah  video album hawnna nei

Lamka, Nov. 26: Lunminthang Haokip, IAS, District Election Officer (DEO) leh Deputy Commissioner, Chruachandpur in Systematic Voters' Education and Electoral Participation (SVEEP) Campaign bawlna leh People with Disabilities (PwDs)-te ding ah a phuak,  laa pani, Music Video ah kisiam te chu tuni’n B. Vengnom Community Hall ah hawn in a um a, Dr. Aarti Aggrawal, Consultant, (SVEEP), Election Commission of India in Music Video hawnna a nei hi. Zia hun matna a chun Lunminthang Haokip, IAS, DC/DEO Churachandpur in Assembly Election ding tawh kisai ah District kisaklawkdan a gen a, Rajiv Aggrawal, IAS, Joint Secretary, Election Commission of India leh a zi Dr. Aarti ten le thugenna a nei ui. Zia hun matna chu Soiminlian Lengen, MCS, Chairman (SVEEP), Churachandpur, James Doujapao Haokip, MCS, SDO/AERO Tuibong leh miphachuam ngai hunkhawp in le a uap ui.

 Free Medical Health Camp

Lamka, Nov. 26: Diocesan Social Service Society (DSSS) leh Zou Youth Organisation (ZYO) Kamdou Veng Unit saina tuni’n  zingkallam dak 9:00 a pat in P. Kamdou Veng Play ground ah "Free Medical Health Camp" a um a, zia hun a chun Churachandpur District Hospital apat Nurse 2 , MSF a pat Dr. Jitesh leh Dr. Ramesh, District Hospital te’n damlo mi 300 val etna a nei ua, District Aids Prevention & Control Unit  a pat staff te’n le HIV test bawlna le a nei ui. Diocesan Social Service Society (DSSS) chun, Community Base Initiative Reducing Drugs AIDS Transmission (CBIRDAT) nuai ah Concerned/Target area khenkhat ah Free Medical Camp a chiapi sek un a kigen hi.

Annual Parents Meet nei

Lamka, Nov. 26: Kinship High School, Tuibong in tuni’n School Campus ah Annual Parents Meet leh School Maicham 2016 a nei ua, zia hun a chun Evan. Khuplet Mate in School Maicham siamna leh 2017 Academic Session hawnna  a nei a, zialo a chun 2017 School Academic Session thak ah mat ding Computer set 18, CCTV leh WIFI connection te le latna a nei hi. Chuleh, Hemkholun Touthang, Principal, Dean of Attendance, Controller of Examination, Games & Sports In-Charge, The Ramparts Editorial family leh Academic Dean te’n report piakna a nei ui.

Lathazam, MCS in RTI Helpline hawng

Lamka, Nov. 26: Tribal Rights Vigil Manipur (TRVM), Lamka JHQ in Dorcas Hall, New Lamka ah tuni’n Right to Information (RTI), Helpline hawnna a nei a, zia hun chu  Lathazam, MCS, SDO/BDO Saikot & AC-DC in zingun hina tawh uap in RTI Helpline No. 8131927576/9612901246/9856909994 chu a hawng hi. Chun, Rev Lian Benson, Executive Director, EELC in latna a nei hi. Chun, Mr Thangbiaklian Hangzo, Chief Moderator, TRVM, Lamka JHQ in Right to Information (RTI) tawh kisai ah Tribal Rights Vigil Manipur (TRVM) panlakdan te taklatna  a nei hi. RTI dungzui a chu Government panlakna chuam chuam te chung ah hiatthiamlo leh dawt nuam dawttheina ding ah thuneina piak a hi.

Imphal ah security sukkhau ah um

Imphal, Nov. 26: Imphal khawpi sung ah crime rate a kibelap zing etzuina ding leh Sangai Festival mang te bitzawk sem ding ngaituana’n  State police in security a sukhau thak a, zia chu tawh kitawn in mun chuam chuam ah check points thak banghem zat hawn in a um hi. Zialo a chun Imphal East leh Imphal West Police Commandos te’n muanmawna mun khenkhat in search operation a chiapi zing ui. Tuzingkal ah Koirengei area ah Imphal East Police Commando te’n DSP Robinsun Khamnam mapuina search operation a bawl hun un James Kipgen S/S C-in-C of KNF (N) kiti thupiak dungzui ah nasem KNF (N) active member, Kimboilhing Kipgen @ Senu (28) w/o Letkholen Kipgen @Lelen of Bongbal Khullen Village chu a mandawk ua, ama a pat a chun, James Kipgen S/S C-in-C of KNF (N) tawh kiho matna kimang  mobile phone leh sim card bearing mobile.no 8974328794 le mudaw in a um a, thudawtna nei ding ah Heingang Police station ah piaklut in a um hi. Chuleh, CDO-Imphal east leh 45 AR (Chingmeirong post)  te’n Friends Colony Mantripukhri ah Cordoned  & search operation a bawlnau a chun Md.Rammijuddin (25) s/ o   Md.Nurddin of Moreh Labuk Leikai ward no.5 kit pawsal khat mat in a um a, ama cu KCP (Noyon) group active cadre hin a kigen hi.

Mary Kom in Dec. 20 leh  Legends Award  sang ding

Lamka, Nov. 26: Olympic bronze-medal winning boxer, tamtak in  Mary Kom ti ah a hiat,  Mangte Chungneijang Mary Kom in 20 December 2016 leh Switzerland ah International Boxing Association (AIBA), 70th anniversary hun ah ‘Legends Award’ sang ding a hi. Olympian leh five-time world champion MC Mary Kom chu tu leh tu ah Rajya Sabha MP ahia, President Pranab Mukherjee in April 2016 ah nominate a bawl a hi. Mary Kom chu Asian champion competition chuam chuam ah title banghem zat la leh 2016  AIBA Women’s World Boxing Championships hun ah AIBA brand ambassador khat a hia, 2012 Olympics ah India a pat numei boxer competition ah a qualify umsun a hi bak ah bronze medal a la la zo a hi. Chuleh, Asian Games 2014, Incheon, South Korea ah India numei boxer Gold medal la zo a ma bep a hi. Mary Kom chu award chuam chuam - Padma Bhushan, Arjuna Award (Boxing, Padma Shree (Sports), Contender for Rajiv Gandhi Khel Ratna Award, People of the Year- Limca Book of Records, Rajiv Gandhi Khel Ratna award kiti te dawngta leh Book: Unbreakable is her biography leh Mary Kom (film) a pat award dawngta le a hi.

Sajik Tampak ah  Army te attack ah um; 5 liam 

Leimakhong, Nov. 26: Indo- Myanmar border kiangnai ah um Sajik Tampak, Khangtal village, Chandel district ah tuzingkal dak 9:30 in thingnuaimi pawl khat in patrolling ah chia Indian Army, 21 Para SF (Special Force) te attack a bawl ua, ziana a chun Army personnel 5 in liamna a tuak ua, liamna tuak te chu Helicopter mang ah Army Hospital, Leimakhong tut in a um ui. Para SF trooper te chu remote control, Improvised explosive device (IED) leh meithal mang ah attack kibawl in a kigen a, Para SF trooper te chu gamgi tuam ah thingnuai mi te um thu information a mu dungzui ua, zani a khah border area ah lut uh hi’n army thusuak chun a gen hi. Liamna tuak army personnel te chu;  NK/NA Rakesh Thakur personnel te chu;  NK/NA Rakesh Thakur, L/NK Vikram Salunke, L/NK W lowong leh  Pankaj Singh of 21 Para “D’ Coy te a hiu a, L/NK W lowong dinmun chu critical hi’n a kigen hi. Assam Rifles PRO office thusuak in a genna a chun, border kiangnai, Ranatop ah 21 Assam Rifles in outpost hawng thak a hidan a gen a, outpost a pat km tamlo cha um Khangtal village ah Para SF trooper te chu attack  kibawl in a gen hi. Zia chu tawh kitawn ah security forces te’n border area ah combing operation chiapi a hidan uh le a gen a, attack bawl thingnuaimi te chu gamgi kantan ah zamdawk ding ua muanmaw ahidan le a taklang hi. A langkhatlam ah Revolutionary People’s Front (RPF), Manipur thupuangtu (spokesperson) kahi kiti khat in mobile phone ah attack tawh kisai Imphaltimes a hiatsakna a chun, PLA armed wings 252 Mobile Battallion in zia attack chu a bawl a hidan agen a, Coordination Committee (CorCom)  in mun chuam chuam ah attack a chiapi sutzawpna khat hi’n a gen hi.

JNIMS ah Chinese Hand Grenade ki mudawk

Imphal, Nov. 26: Porompat, Imphal ah um Jawaharlal Nehru Institute of Medical Sciences (JNIMS), OPD Ward, first floor kaltona (stair) ah tuzingkal dak 9:30 in Chinese Hand Grenade khat mudaw in a um a, zia chu tawh kitawn in Porompat Police team leh Bomb expert te’n bomb chu  puaklo in a la dawk ui. Zia thiltung tawh kisai a chun, JNIMS Director Laishram Deban in bomb kawitu te kipuang ding leh a kawina ziak uh taklang ding in a gen a, bomb kawi ah mipi te suk lau sang ah Director Office ah thil umdan tutzawk ding a nawp thu a gen hi.

 Accident ziak ah CRPF 1 thi, 4 liam

Imphal, Nov 26: Sapermeina Police station nuai ah um Chil Chil area, Senapati district ah tuzingkal dak 6:00 in CRPF gari khat in tuaksiat a tuak a, ziana a chun CRPF personnel 1 in thina a tuak a, 4 in liamna a tuak ui.  Liamna tuak te chu  RIMS ah etkawl in a um ua, thiluang chu postmortem bawl ding ah RIMS morgue ah kawi in a um hi.

News 26 November 2016

Sub-Dealer te’n Kerosene la theita ding

Lamka, Nov. 25: Lunminthang Haokip, IAS, Deputy Commissioner, Churachandpur in  thusua a bawlna a chun Churachandpur  District huap sung ah Assembly Constituency guk (6)- 55- Parbung, 56-Thanlon, 57-Henglep,  58- Churachandpur, 59- Saikot leh 60- Singngat ah SK Oil (Kerosene) Sub-Dealer te’n thautui latheita ding a hidan a taklang a, thautui lading Sub-Dealer te’n Identity Card  a chawi uh ngai ding leh kituptak ah suai kikaina ding mun ah suai a kai uh ngai ding in a gen a, hun dang ah tha khat quota (monthly quota) 152 KL hisek chu SK Oil State quota a kiam tawh kitawn ah October leh November tha quota chu 72 KL ah kisuniam a hidan taklang kawm in Churachandpur District a ding ah tha  2 quota hung tung chu a kigawm ah 144 KL a hidan a gen hi.

Gamgi km 3 huap sung ah 144 Cr.Pc puan ah um

Lamka, Nov. 25: Lunminthang Haokip IAS, District Magistrate, Churachandpur in International Boundary  kantan ah Myanmar a pat Churachandpur District huap sung ah khamthei chuam chuam puaklut ding khapna  Border a pat km 3 huap sung ah nitak dak 5:00 a pat zingkal lam dak 5:00 kikal sung ah 144 Cr.Pc puan a hidan a taklang a,  zia hun kipia sung a chu Company Operating Base (COB), Temporary Operating Base (TOB) leh Assam Rifles leh Indian Army Commander te hiatpina bei ah kuama gamvak lo ding ah hiatsakna bawl kawm in lampi lian tilo ah  gamlak ah vaklum let lo ding in hiatsakna thusua a bawl hi.

SP/CCpur in Drug Cell panlakna taklang

Lamka, Nov. 25: Rakesh Balwal, IPS, SP Churachandpur in tunitak lam dak dak 2:00 in ama Office Chamber ah thuthak lakhawm mite kimupi in District sung ah Zu leh Khamtheih zawkna tawh kisai ah maban panlak ding dan taklatna a nei hi. SP Churachandpur in a genna a chun, Alcohol & Drug Cell kiti siamdaw ah um a hidan taklangkawm in Alcohol & Drug Cell te panlakna zu zuakna, zu dawnna leh khamtheih zuakna leh puaklutna kiti te hiatchian ah umta hi’n a gen a, khawpi sung ah zalen tak ah zudawn ti te khap a hidan taklang in, zu ki chawk ah, inn ah dawn a hileh khap hilo in a gen hi. Khaw-lai vel ah zu dawn in khawtang a ding ah siatna tampi tun a hi ziak in, khawtang hawi ding dawi zosia’n police te panlakna kithuapi ding in  chialna a bawl a,  Zu tilo Khamthei dang tawh kisai  chu zu khapna tawh kisai kituptak ah etzui a hitak leh etzuina pat hiding in a gen hi. SP Churachandpur in a genbena a chun, Pharmacy khenkhat Doctor zik tilo khamthei bawl te ding ah a zuak pawl um a hidan leh a zuaktute le hiatchian vek ah umta a hidan a gen a, ziagual chiindan hawilo chu a haisanlo ualeh dan tawh kituak ah action khautak lak hiding in a gen hi.

 No Due Certificate hard copy piakdaw hitalo ding

Lamka, Nov. 25: Manipur State Power Distribution Company Limited (MSPDCL), Churachandpur Division in “No Due Certificate” tawh kisia ah thusua a bawlna a chun, No Due Certificate hard copy chu December 2016  nung a pat piakdaw hitalo ding in a gen a, 2017 a pat Online/One-Time, No Due Certificate piak hizawta ding in a taklang hi.  Zia chu tawh kitawn ah Manipur Government nuai a sem, Churachandpur Division sung ah um te’n Deputy Manager (IT), MSPDCL, Churachandpur Division kiang ah Office hours sung ah One-Time No Due Certificate update/submit/ sukdik ti te bawlsak thei hiding in le a gen hi. Chuleh, official website: www.powernodue.com ah le a diklo a um khak leh etchian thei hiding in a gen hi.  Chuleh, Prepaid Meter mang himaleh Post Paid mang dan ah kiziklut kha a um ua leh Prepaid Consumer ID leh Meter Number piak ah sukdik thei hiding in a taklang hi.

UNC President mat ah um

Lamka, Nov. 25: Imphal West Police in tuni’n United Naga Council (UNC) President chu a umna a pat mandawk a hidan uh hiat in a um a, thutut a kimudan in Imphal West Police te’n Gaidon Kamei (52) s/o (late) Landou Kamei of Noney Part-1, tu leh tu Namdulong khua um chu a umna va man  uh hi’n a kigen a, a gari (bolero) hektu banah UNC Information Secretary, Sankhui Stephen (36) s/o (late) Sankhui Thamnok of Komsen Village, Chandel District le mankhawm ua hiat a hi.  UNC president kimatna ziak chu hiatchian hilo maleh Manipur leh State dang kawmtuana National Highway 2 – Imphal- Dimapur leh Imphal Jiribam lampi ah UNC in Economic Blockade a bawl zing ziak hiding in tamtak in a gen ui. A langkhatlam ah UNC President mat ah a um, lungawilo suklatna Naga area ah total shutdown kipan ngal in a kigen hi.

67th Annual-cum-Mission Conference

Lamka, Nov. 25: New Testament Baptist Churches Association (NTBCA) in Garlow Memorial Chapel, NTBCA Campus, Bible Hill ah tuni’n “Gospel to all Creation” ti thupi mang in 67th Annual-cum-Mission Conference a mang pan ua, Rev. K. Hangnung, Executive Secretary, NTBCA in Seminar hawndawna leh Pathian kiang ah kawlsakna a nei hi. Seminar  1^st Session ah Rev. Dr. Ginneihthang Ngaihte, OMF International, Thailand leh Director of Assian Cross-Cultural Training Institute, Singapore in “Trends in the World Mission of God” ti thupi mang in  Seminar  hun ama pui a, 2^nd Session ah Ningkhan Ching Ngaihte in “A Healthy Missionary Family” ti thupi mang in amapui hi. Chun, 3^rd  Session ah “God’s Equipment for Mission” ti thupi mang in Rev. Dr. Gin Neihthang Ngaihte in Seminar hun amapui a,   nitak kikhawp hun ah Rev. Dr. HC Stephen in Conference hawnna leh Pathian kiang ah kawlsakna a nei hi.

Winter Meet-cum-Football Talent Search Tournament

Lamka, Nov. 25: Bungmual Veteran Football Association (BVFA) in a hung tung ding December 9 a pat December 20, 2016 sung ah Lalpuithluaii Foundation School Football Ground, Bungmual ah Winter Meet-cum-Football Talent Search Tournament kiti nei ding a hiu a,  Tournament ah School kailai, Kg 50 nuailam mite pang thei ding a hiu a, lunglutna nei Football Club/Association/Group te’n Entry Fee 500 tawh lekha pawimaw chuam chuam te November 28, 2016 tiang ah lathei ding uh leh December 8, 2016  tiang ah a piaklut uh ngai ding in a kigen hi. Chulhe, 1^st Prize Rs. 5,000, 2^nd Rs. 2,000 leh semi final ah gual lel team 2 te’n  Rs. 1,000 tuak  banah Man of the Tournament in Rs. 1,000 sang ding a hi.

Silver Jubilee Celebration-cum-Annual Prize Distribution

Lamka, Nov. 25: Sunshine English High School, Molnom in tuni’n School huangsung ah Silver Jubilee Celebration-cum-Annual Prize Distribution a mang a,  zia hun chu Khaipao Haokip, MDC Kholmun in Chief Guest hina tawh a uap a, Paolal Haokip, MDC Henglep in Guest of Honor hina tawh a uap hi. Chun,  Thangjang Haokip, President, KIC in Functional President hina tawh a uap hi.  Zia hun a chun, Chief Guest Khaipao in Jubilee Suang hawnna a nei a,  Functional President, Thangjang in Souvenir hawndawn a nei hi. Chulhe,  Khaisat Kipgen, Sunshine English High School, Vice Principal in HSLC Examination 2016 ah lawtinna nei a chung chuang diak te taklatna leh thil piak piakna a nei hi.

ATWU in 6th Schedule tawh kisai ah Centre palai te kimupi

Lamka, Nov. 25: All Tribal Women Union (ATWU) General Headquarter palai New Delhi ah Sixth Schedule demand tawh kisai ah Central Government  kihopi ah chia Churachandpur a hung tun kit uh tawh kitawn in tunitak lam in District Hospital, Morgue ah report piakna a nei ua, zia hun a chun Nianglian, President, ATWU General Headquarter in Delhi a chianau tawh kisai taklatna a nei hi. ATWU President, Nianglian in a genna a chun India President, Pranab Mukherjee, M.P chuam chuam, Kiren Rijiju, Minister of State for Home Satender Garh, Joint Secretary, North East, D. Raja, MP (Rajya Sabha), Majeed Memon, MP (Rajya Shaba), Dr. Prof. Kirit Premjibhai Solanki, MP (Lokh Sabha) Chairperson, Parliamentary Standing Committee on Welfare of Schedule Caste and Schedule Tribe, Choudhary Mehbood Ali Kaisar, MP (Lok Sabha), Neiphiu Rio, MP (Lok Sabha), Dr. A Sampath MP (Lok Sabha), P. Chidambaram, MP (Rajya Sabha) Chairman of House Committee, Conrad Sangma, MP (Rajya Sabha), Blswajit Diamary, MP (Rajya Sabha) te kimupi ah Sixth Schedule tawh kisai genpi a hidan uh a gen a, Parlament Session ah Special Mention/Short Duration Discuss ding ah Sixth Schedule tawh a puaklut ding ua chialna bawl uh hi’n a gen hi. Prime Minister Narendra Modi le mupi gua maleu lemchanlona ziak ah muthei lo ahidan uh genkawm in ATWU in lungke lo ah demand lawtin theina ding ah pankhawmna te ziak ah demand mu ngei ding ah kinepna nei in a gen hi. ATWU  team te chu November 12, 2016 ni Churachandpur nusia Sixth Schedule demand tawh kisai ah Delhi ah Central Government palai te kimupi ding ah kipandawk a hiu a, November 23, 2016 ni ah Lamka tungkit a hiu.

 Nisin pawimaw van pua Truck 440 Imphal tung 

IMPHAL, Nov 25: National Highway 37 (Imphal-Jiribam) lampi chuan ah, Manipur a ding nisin pawimaw van chuam chuam pua, loaded truck  440 te chu 7th IRBcommandant leh Police Commandoes  banah Manipur Rifles te venbitna nuai in  tuni’n Imphal a tung ua, truck 440 lak a chun, petrol tankers 33, diesel tanker 58, SK Oil tankers  4, ATF fuel tankers3,  Anchang loaded trucks 99, cement loaded trucks 86 leh van pawimaw chuam chuam pua  loaded trucks 144 a pang hi. A kihiatdan in loaded trucks hunkhawp le zing leh Imphal tung ding in a kigen hi. 

Sadar Hill Dist . issue ah stakeholder te thuhiat hilo: ANSAM 

Imphal, Nov 25 : All Naga Students' Association Manipur (ANSAM) President Seth Shatsang in press conference ah tuni full-fledged revenue district ah Sadar Hills District siamdaw ding dawilo ziak ah United Naga Council (UNC) in lung awilo etsakna National Highway ah Economic Blockade a bawlna chung ah United Naga Council (UNC) President Gaidon Kamei (52) leh UNC Information and Publicity Secretary Mr Sankhui Stephen (36) mat ah a um uh chu a vaima theipen ah thasuak (release) ding phut kawm in full-fledged revenue district ah Sadar Hills District siamdaw theina ding ah a sukkhak ding ahiloleh a kisai khakpi te tawh kihona a um masak ding pawimaw a hidan a gen a,  Sadar Hills District siamdaw leh siamdaw lo ding chung chang ah Naga te’n  "Yes” le tilo, No le tikhalo in a gen hi.”  Chuleh, bang ziak ah kihona leh kithu hiattuana bei ah state government in thupukna a siam thei a h’em? ti’n dawtna a siam a, Sadar Hills District issue tawh kisai ah UNC, ANSAM thuhiat ah um khalo a hidan a gen hi. Chuleh, Naga te’n Naga, Nepali, Meitei, Kuki, Thadou ti ah a chuam ah thuhiat leh kihopi ding ti hizawlo ah Sadar Hills huap sung ah cheng stakeholder te thuhiat ah kihona a um ding demand hizaw’n a gen hi. 

Manipur ah National Highways Projects 2, chiapi hiding 

Imphal, Nov 25 :Ministry of Road Transport & Highways in North Eastern region ah lampi project  pali (4) chiapi ding in final a bawl a, zia project dungzui a chu Rs  1173.98 Crore seng ah lampi 112.88 km  ah sau siam hiding a hi. Zia project 4 te lak a chun Manipur ah project 2 a um a, Nagaland  leh Arunachal Pradesh ah project 1 gel a um hi.  First project chu lampi ums ate siam hawi thak ding, NH 39 (Mao – Imphal section) ah 47.67 km ah sau lampi, Rs 230.46 crore seng ah siamthak ding (lane pavement leh paved shoulder) ti a hia, zia project chiapina ding a chu a gam le umta in a kigen hi.  Second project chu  NH 39 (Mao- Imphal Section) ah 27 km ah sau lampi Rs 139.87Crore seng ah siam ding, zia ding a chuleh a gam um hita in a kigen hi. Arunachal Pradesh ah Itanagar - Banderdewa Section  of NH-415  ah  4-laning, 10.9 km ah sau lampi  Rs 341.83 crores seng ah siam hiding ahia, zia ding a chu state government 30/40 m ROW free ah paik hiding a hi. Nagaland ah project chu 27.3 km ah sau, khawpi sung huap, NH- 39 ah Dimapur leh Kohima kamtuana lampi chu Rs 461.82 crore seng ah siam hiding a hi. 

Governor in A. K Mirabai Devi kimupi  

Imphal, Nov. 25: Manipur Governor Dr Najma A. Heptulla  A. K Mirabai Devi, Minister (social Welfare) Manipur kimupi in ama dep[artment nuai ah Scheme/programs implement kibawldan tawh kisai in a holimpi a, zia hun a chun Governor in khangthak te leh numei te khualna  Skill Training nasatak ah chiapi pawimaw a hidan leh employment banah entrepreneurship lam promote bawl theina ding ah panlak pawimaw a sakdan a gen a, centre scheme  te chu huapzau tak ah chiapi ding a nawp thu genkawm in a pawimaw dungzui ah panlakpi ding hi'n a gen hi.

Union Minister of Textiles in Leimakhong pha ding 

Imphal, Nov. 25: Smriti Zubin Irani, Indian politician, former model, television actress leh producer, tu leh tu ah Union Minister of Textiles in 27 November 2016 leh  Leimakhong ah Apparel and Garment Making Centre hawnna  nei ding a hi.

 

Rs 44  lakhs tawh mi 3  kiman 

Imphal, Nov. 25:  Senapati Brigade nuai ah Tamei Battalion Troops te’n zani, Wairangba II, District-Tamenglong ah gari khenkhat surprise check a bawlnau ah  Mahindra Scorpio, Registration No MN-01-G-6531 ah kipua  Rs 44 Lakhs a man dawkua, sum kipuakna gari chuang pawsal 2 leh numei 1 hentang in a um ui. Hengtang ah um te chu Joyson Kamei s/o Mr Kandai Kamei of Nungba, District-Tamenglong,  Mr Stephen Gongmei s/o  Mr Dinrei Gongmei of Gaidimjang, Police station-Khoupam, District-Tamenglong leh Ms Romancy d/o Mr Chittaranjan of Lairikyengbam Leikai District-Imphal East te hi’n PIB Defence, Imphal thusuak chun a gen a, hentang ah um mi 3 te leh sum banah gari chu Police te khut ah kipedawk in le a gen hi. 

CM in Thoubal District, Industrial Estate hawng 

Imphal, Nov. 25:  Manipur Chief Minister O Ibobi Singh in tuni’n Kuraopokpi Thoubal District ah Industrial Estate hawnna a nei a, zia hun chu official hunkhawp in le a uap ui.  Zia District Industrial Estate  siam patna ding a chu September 04, 2014 a khah Minister of Commerce & Industries, Govindas Konthoujam Foundation suangphu hawnna ala nei ahia, Micro-Small Enterprises  Cluster Development Programme (MSE-CDP) scheme nuai ah kisiam a hi.