NEWS- NOVEMBER 27, 2016

KSO CCpur in student curfew puang

Lamka, Nov. 26: Kuki Students’ Organization (KSO) Churachandpur in thusua a bawlna a chun High School leh Higher Secondary School kumtawp Exam a nai tawh kitawn in Student lekha simlai te ding ah Curfew  puan a hidan a taklang a, zia dungzui a chu November 26, 2016  a pat student kuama nitak dak 5:00 leh zingkal dak 6:00 kikal ah a vak lum let umtheilo ding ti a hia, zia curfew chu exam zosia zawthian ahi masia chiapi hiding in agen hi. Chun, nu-le-pa leh gurdian te chu  Student Curfew enzui ding ah mawpuakna piak ah um KSO Volunteer-te kithuapi ding in dawtna a siam hi.

Gari gu kipei khat kimandawk

Lamka, Nov. 26: Khawpi sung ah Gari chuam chuam gu kipei khat tuni’n matdaw in a um a, mat ah um gucha chu Paominthang@Joy (31) s/o Kailian of Mata Mualtam a hia, a chiata November 21, 2016 zankim dak 12:00 leh zingkal dak 4:00 kikal vel ah Thingkangphai a um, Lalngurliana Sailo in a inn ah a kawi, Karisma Bike, (Registration Number MZ01E 6876) gudawk ah a zuak chu, tuni a zuakna pa Bike ah a tailai mu a hi tawh kitawn ah Bike chawtu a pat  Paominthang@Joy chu matdaw ah um a hi. Joy chu Chemcha, Activa RC Book, (Registration Number MN01Q 7796) Wakambam Dina Sing s/o (L) W. Nodia Singh of Laipham Khunou Nayai Leikai, Imphal min ah um leh Driving Licence, J. David Hmar of Rengkai Road tawh matkhawm a hia, a kipuandan in khamthei bawl a hi ziak ah a khamthei chawkna ding ah gukchak a chiin hi’n a gen hi.

Nov. 29 leh Sum note thu genkhawm hiding

Lamka, Nov. 26: Soiminlian Lengen, MCS, Chief Executive Officer, Autonomous District Council, Churachandur in thusua a bawlna a chun,  India Government in sum note lian Rs 500 leh Rs1000 mat hitalo ding ah a puan nung ah mitamtak in buaina a tuak zingna chung ua, district sung ah a kisaipi chuam chuam te tawh  November 29, 2016  nitaklam dak 2:00 leh Chairman, ADC Office Chamber  ah genkhawm hiding in a gen a, zia hun chu pello ah, pangkim chiat ding in a kisaikhakpi, Association, Bank Manager tit e hiatsakna a bawl hi.

International Law Day

Lamka, Nov. 26: Churachandpur District Legal Services Authority (DLSA) saina tuni’n Life Café, Rengkai Road ah International Law Day mat in a um a, zia hun a chun Letkho Kipgen, Secretary, CDLSA in vaidawn thugenna a nei a,  David Piaklian, MCS, Additional SP (Law & Order), Churachandpur leh AG Sharma, SDPO Churachandpur te’n dan leh thupiak enzui a hi dungzui un, Dan tawh kisai ah panlakna chuam chuam um te a gen ui. International Law Day kimatna chu District sung ah Civil Police leh Women Police tamtak in le a uap ui.

UKB’n a thupi theipen ah Cup lawm ding

Lamka, Nov. 26:United Khawzim Bothers (UKB) official te leh supporter te’n tuni’n VPC Office, Belthel Veng, New Lamka ah meeting a nei ua, zia hun a chun 8^th Seikam Memorial Open Tournament 2016 ah ah  Cup a lak uh lawpna a thupi theipen ah nei ding in lemsakna a nei ui. Cup lawpna tentative date ding in 14 December 2016 a guangal ua, amun leh a hun ding banah programme  detail tawh kisai tunung sawtlo ah suadaw hiding in le lemsakna a nei ui. Chuleh, a kihiatdan in Cup lawpna chu nikhat pumlum (day & night) ah nei hiding leh entertainment chi chuam chuam tawh thua hiding in a kigen hi.  

MEMCOS in ‘Golden Jubilee’ mang

Lamka, Nov. 26: MEMCOS Office, Ngulthong Bazaar, New Lamka  ah Manipur Ex-Servicemen MPCS Limited (MEMCS) kiphudaw nung kum 50 tin lawpna ‘Golden Jubilee” tuni’n a um a, zia hun chu Langkhanpau Guite, Chairman, ADC Churachandpur in Chief Guest hina tawh a uap a, Gouzamang Guite, EM, ADC Churachandpur in Guest of Honor hina tawh a uap hi. Chief Guest Langkhanpau in Jubilee Suangphuh hawnna a nei a, Rev. T Songkhanthang, Local Pastor, EBCC Vengnuam in Pathian’ kiang ah latna a nei hi. Havildar Evangelist Haukhopau Gangte in member thita te suunna hun a mapui a, Lance Niak Sumkunga, President in MEMCOS dinmun leh a umdan genna a nei hi. Guest of Honor Gouzamang in a thugenna a chun , sepai pension nung ah Pawl kibawl dawk kum 50 tin lawm thei ah a um kipakpi a hidan a gen a,  jubilee kimang chu semtu tamtak te ding ah lamhiltu a pan ding a nawp thu a gen hi. Chief Guest Langkhanpau in a thugenna a chun, MEMCOS member famta te suunpi mama a hidan taklangkawm in, Service zaw nung ah MEMCOS member  khawtang leh Kochuam ah kimang tamtak a um chu thupi sa a hidan a gen hi. Tulai sum note 500 leh 1000 mat theilo ah a umna chung ah kihiatthiamna tawh khawsak chiat ding a nawp thu genkawm in Christmas leh Kumthak matna a buailona  ding ah sum note lui te kila tua leh kipia tua ding in a gen hi.  MEMCOS chu  Managing Director 1, Board of Directors 9, member 140 vel nei a hi.

Dist. 1^st Division League final ah NLYC in KYU zo

Lamka, Nov. 26: Churachandpur District Sports Association (CDSA) saina a chiatha zing (L) Khaikhanlian First Division League final match , Peace Ground, Tuibuang ah tuni’n a um a, match kipat masang in (L) Khaikhanlian’ Nu-le-Pa te’n player te inspection bawlna a nei ua, Match Refree mapuina  (L) Khaikhanlian suunna hun mat in a um hi. Final Match ah NLYC leh KYU te a kihel ua, full time ah gual goal khum a um lo ziak un penalty ah NLYC in 4-2 in KYU a zo a, (L) Khaikhanlian First Division League ah Champion hina a chang hi. A langkhatlam ah First Division League final match  um ziak a chun, (L) Damien Letminlun Gangte Memorial District II Division League kihelna tuni’n chawlsak in a um hi.

Dr. Aarti in SVEEP tawh kisai ah  video album hawnna nei

Lamka, Nov. 26: Lunminthang Haokip, IAS, District Election Officer (DEO) leh Deputy Commissioner, Chruachandpur in Systematic Voters' Education and Electoral Participation (SVEEP) Campaign bawlna leh People with Disabilities (PwDs)-te ding ah a phuak,  laa pani, Music Video ah kisiam te chu tuni’n B. Vengnom Community Hall ah hawn in a um a, Dr. Aarti Aggrawal, Consultant, (SVEEP), Election Commission of India in Music Video hawnna a nei hi. Zia hun matna a chun Lunminthang Haokip, IAS, DC/DEO Churachandpur in Assembly Election ding tawh kisai ah District kisaklawkdan a gen a, Rajiv Aggrawal, IAS, Joint Secretary, Election Commission of India leh a zi Dr. Aarti ten le thugenna a nei ui. Zia hun matna chu Soiminlian Lengen, MCS, Chairman (SVEEP), Churachandpur, James Doujapao Haokip, MCS, SDO/AERO Tuibong leh miphachuam ngai hunkhawp in le a uap ui.

 Free Medical Health Camp

Lamka, Nov. 26: Diocesan Social Service Society (DSSS) leh Zou Youth Organisation (ZYO) Kamdou Veng Unit saina tuni’n  zingkallam dak 9:00 a pat in P. Kamdou Veng Play ground ah "Free Medical Health Camp" a um a, zia hun a chun Churachandpur District Hospital apat Nurse 2 , MSF a pat Dr. Jitesh leh Dr. Ramesh, District Hospital te’n damlo mi 300 val etna a nei ua, District Aids Prevention & Control Unit  a pat staff te’n le HIV test bawlna le a nei ui. Diocesan Social Service Society (DSSS) chun, Community Base Initiative Reducing Drugs AIDS Transmission (CBIRDAT) nuai ah Concerned/Target area khenkhat ah Free Medical Camp a chiapi sek un a kigen hi.

Annual Parents Meet nei

Lamka, Nov. 26: Kinship High School, Tuibong in tuni’n School Campus ah Annual Parents Meet leh School Maicham 2016 a nei ua, zia hun a chun Evan. Khuplet Mate in School Maicham siamna leh 2017 Academic Session hawnna  a nei a, zialo a chun 2017 School Academic Session thak ah mat ding Computer set 18, CCTV leh WIFI connection te le latna a nei hi. Chuleh, Hemkholun Touthang, Principal, Dean of Attendance, Controller of Examination, Games & Sports In-Charge, The Ramparts Editorial family leh Academic Dean te’n report piakna a nei ui.

Lathazam, MCS in RTI Helpline hawng

Lamka, Nov. 26: Tribal Rights Vigil Manipur (TRVM), Lamka JHQ in Dorcas Hall, New Lamka ah tuni’n Right to Information (RTI), Helpline hawnna a nei a, zia hun chu  Lathazam, MCS, SDO/BDO Saikot & AC-DC in zingun hina tawh uap in RTI Helpline No. 8131927576/9612901246/9856909994 chu a hawng hi. Chun, Rev Lian Benson, Executive Director, EELC in latna a nei hi. Chun, Mr Thangbiaklian Hangzo, Chief Moderator, TRVM, Lamka JHQ in Right to Information (RTI) tawh kisai ah Tribal Rights Vigil Manipur (TRVM) panlakdan te taklatna  a nei hi. RTI dungzui a chu Government panlakna chuam chuam te chung ah hiatthiamlo leh dawt nuam dawttheina ding ah thuneina piak a hi.

Imphal ah security sukkhau ah um

Imphal, Nov. 26: Imphal khawpi sung ah crime rate a kibelap zing etzuina ding leh Sangai Festival mang te bitzawk sem ding ngaituana’n  State police in security a sukhau thak a, zia chu tawh kitawn in mun chuam chuam ah check points thak banghem zat hawn in a um hi. Zialo a chun Imphal East leh Imphal West Police Commandos te’n muanmawna mun khenkhat in search operation a chiapi zing ui. Tuzingkal ah Koirengei area ah Imphal East Police Commando te’n DSP Robinsun Khamnam mapuina search operation a bawl hun un James Kipgen S/S C-in-C of KNF (N) kiti thupiak dungzui ah nasem KNF (N) active member, Kimboilhing Kipgen @ Senu (28) w/o Letkholen Kipgen @Lelen of Bongbal Khullen Village chu a mandawk ua, ama a pat a chun, James Kipgen S/S C-in-C of KNF (N) tawh kiho matna kimang  mobile phone leh sim card bearing mobile.no 8974328794 le mudaw in a um a, thudawtna nei ding ah Heingang Police station ah piaklut in a um hi. Chuleh, CDO-Imphal east leh 45 AR (Chingmeirong post)  te’n Friends Colony Mantripukhri ah Cordoned  & search operation a bawlnau a chun Md.Rammijuddin (25) s/ o   Md.Nurddin of Moreh Labuk Leikai ward no.5 kit pawsal khat mat in a um a, ama cu KCP (Noyon) group active cadre hin a kigen hi.

Mary Kom in Dec. 20 leh  Legends Award  sang ding

Lamka, Nov. 26: Olympic bronze-medal winning boxer, tamtak in  Mary Kom ti ah a hiat,  Mangte Chungneijang Mary Kom in 20 December 2016 leh Switzerland ah International Boxing Association (AIBA), 70th anniversary hun ah ‘Legends Award’ sang ding a hi. Olympian leh five-time world champion MC Mary Kom chu tu leh tu ah Rajya Sabha MP ahia, President Pranab Mukherjee in April 2016 ah nominate a bawl a hi. Mary Kom chu Asian champion competition chuam chuam ah title banghem zat la leh 2016  AIBA Women’s World Boxing Championships hun ah AIBA brand ambassador khat a hia, 2012 Olympics ah India a pat numei boxer competition ah a qualify umsun a hi bak ah bronze medal a la la zo a hi. Chuleh, Asian Games 2014, Incheon, South Korea ah India numei boxer Gold medal la zo a ma bep a hi. Mary Kom chu award chuam chuam - Padma Bhushan, Arjuna Award (Boxing, Padma Shree (Sports), Contender for Rajiv Gandhi Khel Ratna Award, People of the Year- Limca Book of Records, Rajiv Gandhi Khel Ratna award kiti te dawngta leh Book: Unbreakable is her biography leh Mary Kom (film) a pat award dawngta le a hi.

Sajik Tampak ah  Army te attack ah um; 5 liam 

Leimakhong, Nov. 26: Indo- Myanmar border kiangnai ah um Sajik Tampak, Khangtal village, Chandel district ah tuzingkal dak 9:30 in thingnuaimi pawl khat in patrolling ah chia Indian Army, 21 Para SF (Special Force) te attack a bawl ua, ziana a chun Army personnel 5 in liamna a tuak ua, liamna tuak te chu Helicopter mang ah Army Hospital, Leimakhong tut in a um ui. Para SF trooper te chu remote control, Improvised explosive device (IED) leh meithal mang ah attack kibawl in a kigen a, Para SF trooper te chu gamgi tuam ah thingnuai mi te um thu information a mu dungzui ua, zani a khah border area ah lut uh hi’n army thusuak chun a gen hi. Liamna tuak army personnel te chu;  NK/NA Rakesh Thakur personnel te chu;  NK/NA Rakesh Thakur, L/NK Vikram Salunke, L/NK W lowong leh  Pankaj Singh of 21 Para “D’ Coy te a hiu a, L/NK W lowong dinmun chu critical hi’n a kigen hi. Assam Rifles PRO office thusuak in a genna a chun, border kiangnai, Ranatop ah 21 Assam Rifles in outpost hawng thak a hidan a gen a, outpost a pat km tamlo cha um Khangtal village ah Para SF trooper te chu attack  kibawl in a gen hi. Zia chu tawh kitawn ah security forces te’n border area ah combing operation chiapi a hidan uh le a gen a, attack bawl thingnuaimi te chu gamgi kantan ah zamdawk ding ua muanmaw ahidan le a taklang hi. A langkhatlam ah Revolutionary People’s Front (RPF), Manipur thupuangtu (spokesperson) kahi kiti khat in mobile phone ah attack tawh kisai Imphaltimes a hiatsakna a chun, PLA armed wings 252 Mobile Battallion in zia attack chu a bawl a hidan agen a, Coordination Committee (CorCom)  in mun chuam chuam ah attack a chiapi sutzawpna khat hi’n a gen hi.

JNIMS ah Chinese Hand Grenade ki mudawk

Imphal, Nov. 26: Porompat, Imphal ah um Jawaharlal Nehru Institute of Medical Sciences (JNIMS), OPD Ward, first floor kaltona (stair) ah tuzingkal dak 9:30 in Chinese Hand Grenade khat mudaw in a um a, zia chu tawh kitawn in Porompat Police team leh Bomb expert te’n bomb chu  puaklo in a la dawk ui. Zia thiltung tawh kisai a chun, JNIMS Director Laishram Deban in bomb kawitu te kipuang ding leh a kawina ziak uh taklang ding in a gen a, bomb kawi ah mipi te suk lau sang ah Director Office ah thil umdan tutzawk ding a nawp thu a gen hi.

 Accident ziak ah CRPF 1 thi, 4 liam

Imphal, Nov 26: Sapermeina Police station nuai ah um Chil Chil area, Senapati district ah tuzingkal dak 6:00 in CRPF gari khat in tuaksiat a tuak a, ziana a chun CRPF personnel 1 in thina a tuak a, 4 in liamna a tuak ui.  Liamna tuak te chu  RIMS ah etkawl in a um ua, thiluang chu postmortem bawl ding ah RIMS morgue ah kawi in a um hi.

News 26 November 2016

Sub-Dealer te’n Kerosene la theita ding

Lamka, Nov. 25: Lunminthang Haokip, IAS, Deputy Commissioner, Churachandpur in  thusua a bawlna a chun Churachandpur  District huap sung ah Assembly Constituency guk (6)- 55- Parbung, 56-Thanlon, 57-Henglep,  58- Churachandpur, 59- Saikot leh 60- Singngat ah SK Oil (Kerosene) Sub-Dealer te’n thautui latheita ding a hidan a taklang a, thautui lading Sub-Dealer te’n Identity Card  a chawi uh ngai ding leh kituptak ah suai kikaina ding mun ah suai a kai uh ngai ding in a gen a, hun dang ah tha khat quota (monthly quota) 152 KL hisek chu SK Oil State quota a kiam tawh kitawn ah October leh November tha quota chu 72 KL ah kisuniam a hidan taklang kawm in Churachandpur District a ding ah tha  2 quota hung tung chu a kigawm ah 144 KL a hidan a gen hi.

Gamgi km 3 huap sung ah 144 Cr.Pc puan ah um

Lamka, Nov. 25: Lunminthang Haokip IAS, District Magistrate, Churachandpur in International Boundary  kantan ah Myanmar a pat Churachandpur District huap sung ah khamthei chuam chuam puaklut ding khapna  Border a pat km 3 huap sung ah nitak dak 5:00 a pat zingkal lam dak 5:00 kikal sung ah 144 Cr.Pc puan a hidan a taklang a,  zia hun kipia sung a chu Company Operating Base (COB), Temporary Operating Base (TOB) leh Assam Rifles leh Indian Army Commander te hiatpina bei ah kuama gamvak lo ding ah hiatsakna bawl kawm in lampi lian tilo ah  gamlak ah vaklum let lo ding in hiatsakna thusua a bawl hi.

SP/CCpur in Drug Cell panlakna taklang

Lamka, Nov. 25: Rakesh Balwal, IPS, SP Churachandpur in tunitak lam dak dak 2:00 in ama Office Chamber ah thuthak lakhawm mite kimupi in District sung ah Zu leh Khamtheih zawkna tawh kisai ah maban panlak ding dan taklatna a nei hi. SP Churachandpur in a genna a chun, Alcohol & Drug Cell kiti siamdaw ah um a hidan taklangkawm in Alcohol & Drug Cell te panlakna zu zuakna, zu dawnna leh khamtheih zuakna leh puaklutna kiti te hiatchian ah umta hi’n a gen a, khawpi sung ah zalen tak ah zudawn ti te khap a hidan taklang in, zu ki chawk ah, inn ah dawn a hileh khap hilo in a gen hi. Khaw-lai vel ah zu dawn in khawtang a ding ah siatna tampi tun a hi ziak in, khawtang hawi ding dawi zosia’n police te panlakna kithuapi ding in  chialna a bawl a,  Zu tilo Khamthei dang tawh kisai  chu zu khapna tawh kisai kituptak ah etzui a hitak leh etzuina pat hiding in a gen hi. SP Churachandpur in a genbena a chun, Pharmacy khenkhat Doctor zik tilo khamthei bawl te ding ah a zuak pawl um a hidan leh a zuaktute le hiatchian vek ah umta a hidan a gen a, ziagual chiindan hawilo chu a haisanlo ualeh dan tawh kituak ah action khautak lak hiding in a gen hi.

 No Due Certificate hard copy piakdaw hitalo ding

Lamka, Nov. 25: Manipur State Power Distribution Company Limited (MSPDCL), Churachandpur Division in “No Due Certificate” tawh kisia ah thusua a bawlna a chun, No Due Certificate hard copy chu December 2016  nung a pat piakdaw hitalo ding in a gen a, 2017 a pat Online/One-Time, No Due Certificate piak hizawta ding in a taklang hi.  Zia chu tawh kitawn ah Manipur Government nuai a sem, Churachandpur Division sung ah um te’n Deputy Manager (IT), MSPDCL, Churachandpur Division kiang ah Office hours sung ah One-Time No Due Certificate update/submit/ sukdik ti te bawlsak thei hiding in le a gen hi. Chuleh, official website: www.powernodue.com ah le a diklo a um khak leh etchian thei hiding in a gen hi.  Chuleh, Prepaid Meter mang himaleh Post Paid mang dan ah kiziklut kha a um ua leh Prepaid Consumer ID leh Meter Number piak ah sukdik thei hiding in a taklang hi.

UNC President mat ah um

Lamka, Nov. 25: Imphal West Police in tuni’n United Naga Council (UNC) President chu a umna a pat mandawk a hidan uh hiat in a um a, thutut a kimudan in Imphal West Police te’n Gaidon Kamei (52) s/o (late) Landou Kamei of Noney Part-1, tu leh tu Namdulong khua um chu a umna va man  uh hi’n a kigen a, a gari (bolero) hektu banah UNC Information Secretary, Sankhui Stephen (36) s/o (late) Sankhui Thamnok of Komsen Village, Chandel District le mankhawm ua hiat a hi.  UNC president kimatna ziak chu hiatchian hilo maleh Manipur leh State dang kawmtuana National Highway 2 – Imphal- Dimapur leh Imphal Jiribam lampi ah UNC in Economic Blockade a bawl zing ziak hiding in tamtak in a gen ui. A langkhatlam ah UNC President mat ah a um, lungawilo suklatna Naga area ah total shutdown kipan ngal in a kigen hi.

67th Annual-cum-Mission Conference

Lamka, Nov. 25: New Testament Baptist Churches Association (NTBCA) in Garlow Memorial Chapel, NTBCA Campus, Bible Hill ah tuni’n “Gospel to all Creation” ti thupi mang in 67th Annual-cum-Mission Conference a mang pan ua, Rev. K. Hangnung, Executive Secretary, NTBCA in Seminar hawndawna leh Pathian kiang ah kawlsakna a nei hi. Seminar  1^st Session ah Rev. Dr. Ginneihthang Ngaihte, OMF International, Thailand leh Director of Assian Cross-Cultural Training Institute, Singapore in “Trends in the World Mission of God” ti thupi mang in  Seminar  hun ama pui a, 2^nd Session ah Ningkhan Ching Ngaihte in “A Healthy Missionary Family” ti thupi mang in amapui hi. Chun, 3^rd  Session ah “God’s Equipment for Mission” ti thupi mang in Rev. Dr. Gin Neihthang Ngaihte in Seminar hun amapui a,   nitak kikhawp hun ah Rev. Dr. HC Stephen in Conference hawnna leh Pathian kiang ah kawlsakna a nei hi.

Winter Meet-cum-Football Talent Search Tournament

Lamka, Nov. 25: Bungmual Veteran Football Association (BVFA) in a hung tung ding December 9 a pat December 20, 2016 sung ah Lalpuithluaii Foundation School Football Ground, Bungmual ah Winter Meet-cum-Football Talent Search Tournament kiti nei ding a hiu a,  Tournament ah School kailai, Kg 50 nuailam mite pang thei ding a hiu a, lunglutna nei Football Club/Association/Group te’n Entry Fee 500 tawh lekha pawimaw chuam chuam te November 28, 2016 tiang ah lathei ding uh leh December 8, 2016  tiang ah a piaklut uh ngai ding in a kigen hi. Chulhe, 1^st Prize Rs. 5,000, 2^nd Rs. 2,000 leh semi final ah gual lel team 2 te’n  Rs. 1,000 tuak  banah Man of the Tournament in Rs. 1,000 sang ding a hi.

Silver Jubilee Celebration-cum-Annual Prize Distribution

Lamka, Nov. 25: Sunshine English High School, Molnom in tuni’n School huangsung ah Silver Jubilee Celebration-cum-Annual Prize Distribution a mang a,  zia hun chu Khaipao Haokip, MDC Kholmun in Chief Guest hina tawh a uap a, Paolal Haokip, MDC Henglep in Guest of Honor hina tawh a uap hi. Chun,  Thangjang Haokip, President, KIC in Functional President hina tawh a uap hi.  Zia hun a chun, Chief Guest Khaipao in Jubilee Suang hawnna a nei a,  Functional President, Thangjang in Souvenir hawndawn a nei hi. Chulhe,  Khaisat Kipgen, Sunshine English High School, Vice Principal in HSLC Examination 2016 ah lawtinna nei a chung chuang diak te taklatna leh thil piak piakna a nei hi.

ATWU in 6th Schedule tawh kisai ah Centre palai te kimupi

Lamka, Nov. 25: All Tribal Women Union (ATWU) General Headquarter palai New Delhi ah Sixth Schedule demand tawh kisai ah Central Government  kihopi ah chia Churachandpur a hung tun kit uh tawh kitawn in tunitak lam in District Hospital, Morgue ah report piakna a nei ua, zia hun a chun Nianglian, President, ATWU General Headquarter in Delhi a chianau tawh kisai taklatna a nei hi. ATWU President, Nianglian in a genna a chun India President, Pranab Mukherjee, M.P chuam chuam, Kiren Rijiju, Minister of State for Home Satender Garh, Joint Secretary, North East, D. Raja, MP (Rajya Sabha), Majeed Memon, MP (Rajya Shaba), Dr. Prof. Kirit Premjibhai Solanki, MP (Lokh Sabha) Chairperson, Parliamentary Standing Committee on Welfare of Schedule Caste and Schedule Tribe, Choudhary Mehbood Ali Kaisar, MP (Lok Sabha), Neiphiu Rio, MP (Lok Sabha), Dr. A Sampath MP (Lok Sabha), P. Chidambaram, MP (Rajya Sabha) Chairman of House Committee, Conrad Sangma, MP (Rajya Sabha), Blswajit Diamary, MP (Rajya Sabha) te kimupi ah Sixth Schedule tawh kisai genpi a hidan uh a gen a, Parlament Session ah Special Mention/Short Duration Discuss ding ah Sixth Schedule tawh a puaklut ding ua chialna bawl uh hi’n a gen hi. Prime Minister Narendra Modi le mupi gua maleu lemchanlona ziak ah muthei lo ahidan uh genkawm in ATWU in lungke lo ah demand lawtin theina ding ah pankhawmna te ziak ah demand mu ngei ding ah kinepna nei in a gen hi. ATWU  team te chu November 12, 2016 ni Churachandpur nusia Sixth Schedule demand tawh kisai ah Delhi ah Central Government palai te kimupi ding ah kipandawk a hiu a, November 23, 2016 ni ah Lamka tungkit a hiu.

 Nisin pawimaw van pua Truck 440 Imphal tung 

IMPHAL, Nov 25: National Highway 37 (Imphal-Jiribam) lampi chuan ah, Manipur a ding nisin pawimaw van chuam chuam pua, loaded truck  440 te chu 7th IRBcommandant leh Police Commandoes  banah Manipur Rifles te venbitna nuai in  tuni’n Imphal a tung ua, truck 440 lak a chun, petrol tankers 33, diesel tanker 58, SK Oil tankers  4, ATF fuel tankers3,  Anchang loaded trucks 99, cement loaded trucks 86 leh van pawimaw chuam chuam pua  loaded trucks 144 a pang hi. A kihiatdan in loaded trucks hunkhawp le zing leh Imphal tung ding in a kigen hi. 

Sadar Hill Dist . issue ah stakeholder te thuhiat hilo: ANSAM 

Imphal, Nov 25 : All Naga Students' Association Manipur (ANSAM) President Seth Shatsang in press conference ah tuni full-fledged revenue district ah Sadar Hills District siamdaw ding dawilo ziak ah United Naga Council (UNC) in lung awilo etsakna National Highway ah Economic Blockade a bawlna chung ah United Naga Council (UNC) President Gaidon Kamei (52) leh UNC Information and Publicity Secretary Mr Sankhui Stephen (36) mat ah a um uh chu a vaima theipen ah thasuak (release) ding phut kawm in full-fledged revenue district ah Sadar Hills District siamdaw theina ding ah a sukkhak ding ahiloleh a kisai khakpi te tawh kihona a um masak ding pawimaw a hidan a gen a,  Sadar Hills District siamdaw leh siamdaw lo ding chung chang ah Naga te’n  "Yes” le tilo, No le tikhalo in a gen hi.”  Chuleh, bang ziak ah kihona leh kithu hiattuana bei ah state government in thupukna a siam thei a h’em? ti’n dawtna a siam a, Sadar Hills District issue tawh kisai ah UNC, ANSAM thuhiat ah um khalo a hidan a gen hi. Chuleh, Naga te’n Naga, Nepali, Meitei, Kuki, Thadou ti ah a chuam ah thuhiat leh kihopi ding ti hizawlo ah Sadar Hills huap sung ah cheng stakeholder te thuhiat ah kihona a um ding demand hizaw’n a gen hi. 

Manipur ah National Highways Projects 2, chiapi hiding 

Imphal, Nov 25 :Ministry of Road Transport & Highways in North Eastern region ah lampi project  pali (4) chiapi ding in final a bawl a, zia project dungzui a chu Rs  1173.98 Crore seng ah lampi 112.88 km  ah sau siam hiding a hi. Zia project 4 te lak a chun Manipur ah project 2 a um a, Nagaland  leh Arunachal Pradesh ah project 1 gel a um hi.  First project chu lampi ums ate siam hawi thak ding, NH 39 (Mao – Imphal section) ah 47.67 km ah sau lampi, Rs 230.46 crore seng ah siamthak ding (lane pavement leh paved shoulder) ti a hia, zia project chiapina ding a chu a gam le umta in a kigen hi.  Second project chu  NH 39 (Mao- Imphal Section) ah 27 km ah sau lampi Rs 139.87Crore seng ah siam ding, zia ding a chuleh a gam um hita in a kigen hi. Arunachal Pradesh ah Itanagar - Banderdewa Section  of NH-415  ah  4-laning, 10.9 km ah sau lampi  Rs 341.83 crores seng ah siam hiding ahia, zia ding a chu state government 30/40 m ROW free ah paik hiding a hi. Nagaland ah project chu 27.3 km ah sau, khawpi sung huap, NH- 39 ah Dimapur leh Kohima kamtuana lampi chu Rs 461.82 crore seng ah siam hiding a hi. 

Governor in A. K Mirabai Devi kimupi  

Imphal, Nov. 25: Manipur Governor Dr Najma A. Heptulla  A. K Mirabai Devi, Minister (social Welfare) Manipur kimupi in ama dep[artment nuai ah Scheme/programs implement kibawldan tawh kisai in a holimpi a, zia hun a chun Governor in khangthak te leh numei te khualna  Skill Training nasatak ah chiapi pawimaw a hidan leh employment banah entrepreneurship lam promote bawl theina ding ah panlak pawimaw a sakdan a gen a, centre scheme  te chu huapzau tak ah chiapi ding a nawp thu genkawm in a pawimaw dungzui ah panlakpi ding hi'n a gen hi.

Union Minister of Textiles in Leimakhong pha ding 

Imphal, Nov. 25: Smriti Zubin Irani, Indian politician, former model, television actress leh producer, tu leh tu ah Union Minister of Textiles in 27 November 2016 leh  Leimakhong ah Apparel and Garment Making Centre hawnna  nei ding a hi.

 

Rs 44  lakhs tawh mi 3  kiman 

Imphal, Nov. 25:  Senapati Brigade nuai ah Tamei Battalion Troops te’n zani, Wairangba II, District-Tamenglong ah gari khenkhat surprise check a bawlnau ah  Mahindra Scorpio, Registration No MN-01-G-6531 ah kipua  Rs 44 Lakhs a man dawkua, sum kipuakna gari chuang pawsal 2 leh numei 1 hentang in a um ui. Hengtang ah um te chu Joyson Kamei s/o Mr Kandai Kamei of Nungba, District-Tamenglong,  Mr Stephen Gongmei s/o  Mr Dinrei Gongmei of Gaidimjang, Police station-Khoupam, District-Tamenglong leh Ms Romancy d/o Mr Chittaranjan of Lairikyengbam Leikai District-Imphal East te hi’n PIB Defence, Imphal thusuak chun a gen a, hentang ah um mi 3 te leh sum banah gari chu Police te khut ah kipedawk in le a gen hi. 

CM in Thoubal District, Industrial Estate hawng 

Imphal, Nov. 25:  Manipur Chief Minister O Ibobi Singh in tuni’n Kuraopokpi Thoubal District ah Industrial Estate hawnna a nei a, zia hun chu official hunkhawp in le a uap ui.  Zia District Industrial Estate  siam patna ding a chu September 04, 2014 a khah Minister of Commerce & Industries, Govindas Konthoujam Foundation suangphu hawnna ala nei ahia, Micro-Small Enterprises  Cluster Development Programme (MSE-CDP) scheme nuai ah kisiam a hi. 

NEWS

Dr S Ibocha Singh, Inspector General of Police (AdM) in DGP Manipur thasik ah thusua a bawl na a chun,25 November 2016, zingkal dak 8:00 a pat,  Manipur Police Training College, Pangei (MPTC) ah Manipur Police Department nuai ah Police Constable (Male/Civil -2013)recruitment ah Written test zo te ding a  Viva-Voce kipan ding a hia, 15 January 2017 leh zaw thian hiding a hi.Viva-Voce chu District wise ah Chest no. tawh a date ding bithiat in a um a, zia chu a nuai ah gual a hi.

SL No.      Date        District  Chest No.

1. 25/11/2016  Imphal West District 1- 211

  26/11/2016  -do- 213- 427

  27/11/2016  -do- 428- 658

  28/11/2016 -do-  657- 881

  29/11/2016  -do- 882- 1114

  01/12/2016  -do- 1115- 1337

  01/12/2016 -do- 1338- 1565

  02/12/2016 -do- 1566- 1800

  03/12/2016  -do- 1801- 2050

2. 04/12/2016 Imphal East District  1 to 228

  05/12/2016 -do- 229 to 455

  06/12/2016 -do- 456 to 678

  07/12/2016 -do-  679 to 909

  08/12/2016 -do- 910 to 1160

  09/12/2016 -do- 1162 to 1436

  10/12/2016 -do- 1440 to 1751

3. 11/12/2016 Thoubal District 1 to 221

  12/12/2016 -do- 222 to 441

  13/12/2016 -do- 442 to 671

  14/12/2016 -do- 672 to 895

  15/12/2016 -do- 896 to 1116

  16/12/2016 -do- 1117 to 1343

  17/12/2016 -do- 1344 to 1578

  18/12/2016 -do- 1579 to 1828

  19/12/2016 -do- 1830 to 2109

4. 20/12/2016 Bishnupur District 1 to 222

  21/12/2016 -do- 223 to 477

  22/12/2016 -do- 478 to 752

5. 27/12/2016 Chandel District 1 to 203

  28/12/2016 -do- 209 to 466

6.  29/12/2016 Churachandpur District 1 to 210

  02/01/2017 -do- 211 to 420

  03/01/2017 -do- 421 to 741

7.             04/01/2017 Ukhrul District 1 to 168

  05/01/2017 -do- 171 to 340

8.06/01/2017 Tamenglong District 2 to 216

  07/01/2017 -do- 217 to 429

  08/01/2017 -do- 430 to 596

9.09/01/2017 Senapati District 1 to 222

  10/01/2017 -do- 223 to 452

  11/01/2017 -do- 453 to 706

  12/01/2017 -do- 707 to 904

10.13/01/2017 Jiribam Sub-Division 1 to 113

11.14/01/2017 Candidates applied in Sports Category

12. 15/01/2017 Remaining candidates of all districts

CM in IMT Friendship Motor Car Rally flagged off

Imphal, Nov. 23: Chief Minister Shri O. Ibobi Singh in tu-zingkal in India- Myanmar-Thailand (IMT) Friendship Car Rally, flagged off bawlna, Hotel Classic Grande, Imphal a nei a, Rally ah pang te chu damtak leh kipak tak ah rally chiapi ding ah dawisakna thucha lan kawm in a tha dawk hi. Chief Minister in rally flagged off a bawl kuan ah a thugenna a chun rally kibawlna a pat India leh South East Asian gam te kal ah ki unauna a punbe ngei ding ginchatna nei a hidan gen a, Rally ah panla tute kipakpi a hidan taklangkawm in Ministry of Road Transport & Highways, Ministry of External Affairs leh Ministry of DoNER banah Government of India nuai ah Ministry chuam chuam in Rally support a bawlna chung un kipak thu a gen hi. Zia hun chu Commerce & Industries Minister Shri Govindas Konthoujam, Transport Minister Dr. Kh. Ratankumar, DGP LM Khaute, Commissioner (Transport ) M. Lakshmikumar leh state official hunkhawp te’n le a uap ui.  India- Myanmar-Thailand (IMT) Friendship Car Rally chu Delhi kipan, Imphal chuan ah Moreh lut ding leh Myanmar chuan ah Bangkok (Thailand) chan chiapi hiding a hia, distance 5722 kms cover hiding a hi. IMT Friendship Motor Car Rally chu Ministry of Road Transport & Highways, Govt. of India guanggalna leh Ministries of External Affairs/DoNER/Tourism/Petroleum & Natural Gas, Govt. of India support bawlna nei ah um a hia, Indian Chamber of Commerce (ICC), Kolkata leh Kalinga Motor Sports Club (KMSC), Odisha in organised a bawl,  November 13, 2016 ni hawn ah um, December 3, 2016 leh Bangkok ah zaw hiding a hi. Rally team te chu Mr. Praveen Chandra Bhanjdeoof Kalinga Motor Sports Club of Odisha banah sitting MLA of Odisha in a mapui a hia, member lak in India mi 76 , Myanmarese 7, Thais  7 a pang ua, Bangkok tunna ding ah Tamu- Kale –Mandalay-Nay Pyi Taw-Yangon-Thaton-Mayawaddy(Myanmar)-Mae Sot (Thailand) haw malam ding a hiu. 
     

Khualzin mite van mang police in mu piak

Imphal, Nov. 23: Sangai Festival a ding ah Myanmar a pat khualzin Myanmar palai te chu Manipur Police chung ah kipak mama hi dan in a kigen hi. A chiata November 21, 2016 a kan Palace Compound ah Govindajee Temple Gate kiangah US $ 4000; 20 Lakh Myanmar Kyat leh Rs. 30,000 a kuana u bag 1 a mansua ua, police in ni 2 lam nasatak ah pan a lak nung in bag mang chu mukit hi dan in a kigen hi.

Student te’n I-Card pedawk

Imphal, Nov.23: Manipur University ah Physical Education Department student te chun Physical Education Department ah Head of Department (HoD) haisak ding ah kiphinna a nei ua, zia hun a chun Vice-Chancellor khut ah I-Card piakdawna a nei ban un department complex ah HoD in haina pe ding ah phut kawm in sit-in-protest le a nei u hi. Student te gen dan a chun HoD in a mawpuakna ngaisaklo in sep ding ah pawimaw tam tak sem lo hi’n a gen uh hi.

PCTC oil pump ah meikang

Imphal, Nov. 23 : DM College of Arts  gate kiang a um M/S Phul Chand Trilok Chand (PCTC) Oil Pump ah tu sun in tanker 1 chu mei a kuang ah, a hun tak ah fire brigade te a tung ziak un mei kuang chu phelmit pai u hi’n a kigen ban in liamna tuak hiat hilo hi’n le a kigen hi. Lei nuai ah fuel deposit tank ah thau tei thak ding himaleh tanker 1 chun drum tîn 1 ah thau a tei thak a pat chu mei kuang kipan hi ding ah muanmaw a hi. Meikuang chu huaise maleh fire brigade te ziak in mun dang kuang manlo in a phelmit uh hi.

Ni 2 sung ah bank ah Rs 13 Cr. Val bank ah kikawilut

Lamka, Nov. 23: India Prime Minister Narendra Modi in November 8, 2016 nitak ah sum note 500 leh 1000 mat hitalo ding ah a puan tawh kitawn ah  Churachandpur District sung um bank chuam chuam ah sum deposit nuam leh sum note thengtua nuam tam tak a um zing a, sum note luite RBI piak kitna ding in Bank te’n le pan a la zing ui. Prime Minister in sum note 500 leh 1000 mat hitalo ding ah a puan a puanzaw ni 2 sung mai mai ah SBI Churachandpur Branch ah Rs 13 Crore val deposit ah um in muan um tak a pat thutut kimu chun a gen a, Churachandpur District ding ah Chest Bank Branch ni (2) SBI Churachandpur Branch leh UBI Churachandpur Branch te’n sum note luite Reserve Bank of India kiang tut ding ah a sim teu chunkawmna le hun tampi bei ding in a kigen hi. Bank  te’n sum note kithi sak chung ah mipi te ding ah bawl thei takluat neilo maleu zani tak ah District Administration mapuina Live Talk Show a um hun in  Bank lam in dawr/dukan bawl te’n sum note 500 leh 1000 a lak naklai ding ua District Administrator in thusua a bawl ding a nawp thu’u a la taklang ui.

Oil pump kihawng; Thautui dawi tam

Lamka, Nov. 23: Churachandpur District a ding Petrol litres12,000 leh Diesel litres12,000 zani puak lut ah a um tawh kitawn in tuni, November 23, 2016 in Suakhnun & Sons Oil Pump, Bijang ah zawkdaw in a um a, Gari Registration Certificate/Card tungtawn ah thautui dawi te piak in a um a, thautui dawi mi a tam mama  ziak in Petrol leh Diesel dawi te a chuam gel ah kitian sak in a um ui. Thautui dawi tam maleh oil pump Couter ah mi 1 bep chu a hi ziak in line ah kitiang te sau tak tak muthei ding in a um hi. A langkhatlam ah United Naga Council (UNC) in Economic Blockade a chiapi nung ah Mizoram a pat Churachandpur ah thautui puaklut ah a um thei banah Rate biathiat ah zawk a hi ziak in tuni oil pump ah thautui dawi ah line ah ding a zia um deu in a kigen hi.

New Lamka Welcome Gate  kihawng

Lamka, Nov. 23: Young Paite Association (YPA) New Lamka Block mapuina New Lamka Welcome Gate kisiam, zaw thian ah a um tawh kitawn in tuni, November 23, 2016 zingkal dak 7:00 in Tedim Road, Lanva Lei mun ah a hawnna leh a latna a um a,  zia hun a chun S. Chinngaihpau, Chairman, CEC YPA General Headquarter in Welcome Gate hawnna a nei a, Langkhanpau Guite, Adviser, YPA New Lamka Block in Gate latna a nei hi.  Zia hun matna S. Manlian, President, YPA New Lamka Block , Langkhanpau Guite leh Khailianthang, Persident, YPA General Headquarter a pat thugen ngaithakna le a um a, H. Haukhenpau, Treasurer, YPA New Lamka Block in Gate kibawlna tawh kisai in Report piakna a nei hi. Welcome Gate chu October 23, 2016 kisiam pan a hia, Rs 1,62,354 seng ah tha 1 sung kisiam a hi.

SSPP in tanggam school te vedi

Lamka, Nov. 23: Siamsinpawlpi General Headquarter leader te’n 28 Nov. a pat tanggam vena nei ding  ahiu a, zia hun a chu school 4 - Singngat leh Suangdoh Sub-Division sung ah Lungthul (D), Suangdai, Lungchin leh Suangdoh khuate ah School Farewell/Annual Day kimatna uap ding leh Block 5 ah Presidential Election le sai ding un a kigen hi. “Siamsin Education Initiative - An Initiative of Siamsinpawlpi” nuai ah leh  kum kit January 13, 2017, SSPP Plantinum Jubilee matna ding tawh kisai ah campaign bawlna le President Lianzapau Samte mapuina SSPP team in nei ding in a kigen hi. Zia hun sung a chu Manipur State Legal Services Authority leh District Legal Services Authority panpina  Zodawn Legal Awareness le sai ngal ding un a kigen a, resource person ah Advocate M. Vumlianmang Paite LLB pang ding a hi.   

December 31 tiang ah digital payment charge umlo ding

New Delhi, Nov. 23: Debit card, netbanking, mobile phone leh electronic matchak dang dang a pat payment promote na ding in December 31 tiang ah service charge umsaklo ding hi dan in sawlkal in a gen hi. Ministry of Road Rransport and Highways in le digital payment promote na ding in automobile company te kiang in gari kisiam thak zosia ah Electronics Product Code Global Incorporated (EPCG)-compliant Radio-Frequency Identification (RFID) facility umsak vek ding in thu a pia hi. National Payments Corporation of India (NPCI) a pat thusua kimu chun a genna a chun December kichai tiang ah Debit Card mat man service charge lalo ding hi dan ah taklang hi. NPCI thusuak in a gen be na a chun digital payment promote na ding in public sector bank zosia’n Unified Payment Interface (UPI) app nei vek ta hi’n le a gen hi. Economic Affairs Secretary Shaktikanta Das in digital transaction lam ah mi tampi kihei ding hi’n a gen a, zia tawh kisai a hin bank te’n hiatsakna pawimaw a sak te uh taklang pai ta ding in le a gen hi. Public sector unit te leh government agency te’n semtute law chu digital payments, Internet banking, Unified Payment Interface (UPI) leh aadhar mang ah payment te mang ah pe sek ding un thu piak a hi dan a gen ban in private sector te’n le zia gual chu chiapi pai ta ding hi un le Das chun a gen hi. Thudang khat a chun, Railways in le December 31 tiang ah online booking charge lalo ding hi dan in thusua a la bawl hi. Mr. Das in a gen be na a chun India ah billion val mobile phone chawi um maleh 35% bep in smart phone a chawi ua, a dang te chun a hileh phone mantawm chawi hi dan in le a gen hi. Telecom enkaitu TRAI in le thupuan a bawl dungzui in telecom operator te’n le mobile banking transaction charge Rs.1.50 a lak sek uh kha December 31 tiang 50 paise hi ding in thupukna a bawl uh hi.

SBI-RSETI nuai ah  Free Training chiatha zing

Lamka, Nov. 23: State Bank of India – Rural Self Employment Training Institute (SBI-RSETI), Bijang in Trade chuam chuam ah Free Training a sai uh chiazawm zel in tuni, November 23, 2016 in Beauty Parlor Management leh Basic Photography and Videography Training a neizawm ui. Beauty Parlor Management chu November 10, 2016 ni kipan a hia, S. Mangboi, Faculty, SBI-RSETI in REDP in Management  tawh kisai ah theory training a piak zaw nung ah Practical Training kipan ah, Lhainunnem, Guest Faculty, SBI-RSETI in ziltilna a nei zing a hi. Beauty Parlor Management Training na a chun trainee 21 a pang ui Basic Photography & Videography Training a hihleh November 16, 2016 ni kipan ahia, November 21, 2016 ni Practical Training kipan a hi. Basic Photography & Videography Training a chun trainee 14 a um a,  ni 21 sung Training nei ding a hiu hi. Basic Photography tawh kisai a chun Lalboi Samte in ziltilna a nei a, Basic Videography ah Letthang Doungel in ziltilna a nei hi.  Basic Photography and Videography Training chu zaw a hitak leh ni 6 sung  um ding Piggery Training kipan kit ding ahia, zia zaw chu leh ni 21 sung um ding Dress Designing for Women kiti um kit ding a hi.

Nasem tu 2 mat a um

Imphal, Nov. 23: Nasemmi 2 chu melhiatlo te’n Saikul a pat puimang u hi dan in thusuak mu a hi. Puimang a um Akhom Surjit s/o A. Chandra leh Kabarabam Yaima s/o K. Ibohal te chu Lilong Arapti Mayai Leikai a pat a hiu a, Saikul ah chun Contractor Shyam Meitei nuai ah lampi black topping bawl leh retaining wall siam  a hiu.

UNLF 52 nd Anniversary

Imphal, Nov.23: A hungtung ding November 24, 2016 a hileh United National Liberation Front (UNLF) kiphudaw kum 52 a tinni a hi tawh kitawn in UNLF Central Committee in Manipur mipite chibai bukna leh Organisation panlak dan te taklatna thusua a bawl hi. 1949 in hunam ah India nuai in Manipur lutsak a hi  ziak ah India vaihawmna nuai ah Manipur tuitum theilo hi’n thusua chun a gen hi. UNLF in mipite humbitna ding ah pan la zing a hi dan gen kawm in Manipur ah Armed Forces Special Powers’ Act, 1958 kawi a hi chu lemchang sa in security force te’n human rights bawtsia zing u hi’n ngawna le a bawl hi. North East India ah chengte chu Mongoloid chî hi ziak ah India lailung lam ah chengte tawh mel ah kikhiatna te ziak in simmaw chang hi dan in le thusua chun a gen hi.